Keskîne binpaykerdişê heqanê merdiman sey bi destê dewletî meşrûkerdişê şîdetî û astengkerdişê azadîya fikran name kerd. Keskîne bitaybetî bale ante dezgehanê fikran ser û vat: "Seba ke merdim bieşko qala binpaykerdişê bînan ê heqanê merdiman bikero her çi ra verî ganî bieşko xo îfade bikero. Labelê qedexe yo ke ma xo îfade bikê. Eke merdim muxalîfê dewlete û polîtîkayanê aye yo hînî şansê ci çin o ke xo îfade bikero."

Keskîne bale ante ke rewşa nikayêne rewşa serranê 1990î ra xirabêr a û sey dewirê nikayênî dewrêk çinêbi ke merdimî nêeşkenê fikranê xo bi hawayêkê asanî vajê.Keskîne warê sîyasetî ser o tesîrê binpaykerdişê heqanê merdiman ercna û vat îdarekarê dewlete tewr zaf averşîyayîşê sîyasetê sivîlî yê kurdan ra tersenê. Keskîne vat: "Bêguman îşxalê Rojawanî tersê averşîyayîşê kurdan ra semed ame kerdene. Labelê sîyasetê sivîlî yê kurdan wayîrê hêzêkê pîlî yo ke eşkeno tesîrê der û dorê biko. Seba ke naye ra tersenê Selahattîn Demîrtaş û sîyasetmedarê bînî yê HDPyî tepişte yê."

Qeyûm Dewamê Şark Islahatî yo

Keskîne xespkerdişê şaredarîyanê kurdan vist vîrî û vat ke destpêkê komara Tirkîya ra nata vera kurdan huqûqêko cîya yeno xebitnayene. Qeyûmê ke heta nika ameyî tayînkerdene mojnenê ke no eqlê dewlete nêvurîya û polîtîkaya qeyûmî û Şarl Islahat yenê heman mana. Keskîne vat: "Yeno waştene ke kurdî bêrê dîzaynkerdene. No zî asîmîlasyon o. Her qeyûm darbeyêk o ke demokrasî ro yeno dayene."

Tecrîd Şerî Keno Xorin

Keskîne tecrîdê Îmrali zî ercna û vat: "Îmrali de huqûqê zereyî yê Tirkîya nêno caardene, no sîstemêko cîya yo ke çew tira çîyêk fam nêkeno. Labelê zêdebîyayîşê polîtîkaya şîdetî yê vera mesela kurdan reyde tecrîd zî giranêr bi. No tecrîd têna vera Ocalanî nîyo. Tecrîd heman wextî de alozîya mabênê merdiman ê na cografya zî keno zêde. Keskîne vat ke tecrîdê vera Ocalanî û sîyasetê kurdan bi nê hawayî şer keno xorin. Keskîne bale ante ser ke tecrîdo winasên ê vera rayberêkî vera cû dinya de nêamebi dîyene.

Ma Ganä bi Hawayêkê Çêrî Têbigêrê

Keskîne da zanayene ke dewlete xîret kena ke komel bike yew tewir û na babete de tay serkewte zî bîye labelê vera naye zî xoverdayîş hema dewam keno. Keskîne vat: "Ez qet terefgîra bêhêvîye nîya. Ma bêçare nîyê, ma neçare yê ke ma bi hawayêkê çêrî têbigêrê. Ganî ma heqanê xo bizanê û heta peynîye înan bişuxulnê. Ez naye tima ana ziwan û ez reyna vaja; êyê ke xo ver danê do na dinya bivurnê.''