Hemsereka ÎHDyî Erene Keskîna ke derheqê grevê vêşanîye yo ke 70 rojî yo vera tecrîdî yeno kerdene qisey kerd vat: ''Tecrîdê Îmraliyî de hendê Îqtîdarî sûcê muxalefetî zî esto. Keskîne seba ke CPTyî Îmrali zîyaret nêkerd nêrazîbîyayîş ramojna.''

Zîndananê Vakurê Kurdîstanî û Tirkîya de tepişteyê sîyasîyî 70 rojî yo vera tecrîdê serê Rayberê Şarê Kurdî Abdullah Ocalanî grevê vêşanîye de yê.   Tepişteyî vanê eke waştişê înan merê ca ê do çalakîyanê xo pîlêr bikerê. Bi destpêkerdişê xoverdayîşî hêrişê vera tepişteyan zî zêdîya. Rixmê heme hêrişan tepişteyî peyser game nêerzenê û qerardar çalakîya xo rê dewam kenê. Reyna Kampa Memxûrî de grevê vêşanîye ke ame destpêkerdene kewt roja 49. Kampa Lavrioyî ya Yunanistanî de zî 32 rojî yo semedê wedaritişê tecrîdî grevê vêşanîye dewam keno.

Komîteya Vergirewtişê Îşkenceyî  yê Ewropa (CPT) wextê grevê vêşanîye yê vera tecîrdî de Tirkîya zîyaret kerd la nêşî Zîndanê Îmraliyî. Avûkatanê Ocalanî vera nayî hersê xo ard ziwan û seba ke ê nêşîyî îmrali û fîkrê avûkatan nêgiewto sey kêmîye dîye.

Hemsereka ÎHDyî Erene Keskîn ANFyî rê derheqê babate de qisey kerd. Keskîne vat: ''Ma hem selahîyetdaranê fermîyan reyde pêvînayîşan kenê hem zî eşkerayîyan danê la vengê îqtîdarî nêvejîyeno. Ez nayî zî vajî rayapêroyîya ke xo sey muxalîfî name kena zî  bêveng a. Eke babete kurdî bî hem îqtîdar hem zî êyê ke xo sey muxalefetî danê naskerdene vengê înan birîyeno. Semedê Bogaziçi heme komel vengê xo vejeno la 70 rojî yo grevê vêşanîye esto nayî rê veng çîn o. Xora ma zî nêwazenê grevê vêşanîye bibo la sey metode peyênî, sey çareyê peyênî muracatê nayî kerd. Têna kurdî û dezgehê heqanê merdiman derheqê grev de qisey kenê, xeymê çewî de nîyo. Sûcê rayapêroyîye zî esto.''

Keskîne bale ante ser ke wextê xoverdayîşî de hêrişî zî zêdîyayî û vat: ''Awe û şeker zî nêdîyenê tepişteyan. Keyeyanê xo reyde nêeşkenê pêvînayîşan bikerê. Pêvînayîşê avûkan zî yenê astengkerdene. CPTyî Komeleya Heqan ê Merdiman reyde pêvînayîş kerd. Hemserekê ma Ozturk Erdoganî waşt ke ê Îmrali zîyaret bikerê. Mekanîzmaya kontrolî yê CPTyî esta û raporê înan zaf muhîm o. Tirkîya goreyê pêkerdişanê xo tênêgêrena. Mesele tecrîd huqûq de çîn o, heqê tepişteyan yenê binpaykerdene la CPT vera ci tim bêveng o. CPT goreyê tekîlîyanê karê xo yê ekonomîkî têgêreno.''

Kesnîne vera muxalefetî nêrazîbîyayîş ramojna û wîna dewam kerd: ''CHP Kurdîstan de reywaştişî zano la binpaykerdişanê vera kurdan teberê yew-di wekîlan de înan eleqedar nêkeno. Problemê nê welatîyo verên dewlete û îdeolojîya fermîye yo, yê diyîne zî dirîyîya muxalefetî ya. Kurdî têna yenê verdayene.Tepişteyê sîyasîyî yê kurdî estê ke sînorê mergî de yenê veradayene. Tepişteyê ke rojêke badê tehlîye mirenî estê. Nê binpaykerdişê heqanê zaf muhîm ê la eke qala kurdan bîye bêvenîya pîle esta.''

Erene Keskîne vist vîrî ke  a 12 avûkatanê Ocalanî yê verênan ra yew a û wina vat: ''Tecrîd tim estbi. Îmrali goreyê huqûqê zereyî nîno îdarekerdene. Xora roja verêne ra ma huqûqê zereyî nêdî. Ma sey avûkan raştê hêrişan ameyî. Pêvînayîşî ameyî astenkerdene. Badê pêvînayîşanê ''prosesê haştîye'' tecrîd zaf ame xorîkerdene û pinpaykerdişê heqan û hêrişî zafêr bîyî. Seba ke Îmrali de yê tepişteyê bînî zî nêeşkenê merdimanê xo bivînî. Ma serra 2021î de tepişteyî û humkerdeyî nêeşkenê merdimanê xo bivînî. Çew/e nêeşkeno sebebê nayî eşkera bikero.''