Înîsîyatîfê Ocalanî rê Azadîye çarçewa Kampanyaya 'Abdullah Ocalanî rê Azadîye, Kurdîstanî rê Haştîye- Wextê ci yo' de çalakîyêka newîye daye destpêkerdene.lmanya, Fransa, Swîsre, Brezîlya, Îspanya, Swêd, Îtalya, Yunanîstan û Îngilîstanî ra rojnamegerî, akademîsyenî, sîyasetmedarî, nuştoxî, temsîlkarê têgêrayîşanê cinîyan, temsîlkarê dezgehanê Kurdîstanî yê Ewropa, hunermend û sîyasetmedarî zî tede 50 kesî tewrê çalakîye do bibê.

Keştîya Azadîye ewro Atina ra vejîyena rayîr. Înîsîyatîfî vist vîrî ke semedo ke 23 serrî verî 12ê teşrîna peyêne de Rayberê Şarê Kurdî Îtalya de bibi 'Keştîya Abdullah Ocalanî rê Azadîye' 12ê teşrîna peyêne de do Îtalya de biba.

Çalakîkeran keştîye vizêr dest pê bernameyî kerd. Grûba çalakîyan verî partîyanê Syriza, Yewîya Şarî (LAE) û Çepê Neweyî (NAR) de pêvînayîşî kerdî. Pêvînayîş de ame waştene ke Yunanîstan semedê azadîya Ocalanî wezîfeyê xo bikero.

Pêvînayîşê LAE de hunermende Salvatore Malinconico û Hemserekê KCDK-E Yuksel Koçî, wekîla verêne Nursele Aydogan û şaredara verêne Leyla Îmret zî estbîyî.

Salvatore Malinconico pêvînayîş de vat: ''Azadîya Ocalanî eşkena meseleyanê bînan ê herême çareser bikera.''

Sekreterê LAE û wezîrê verênî Dimitrsi Stratoulisî vat: ''Ma sey partî azadîya Ocalanî wazenê û semedê ney xebitîyenê. 

Heyetê pêvînayîşanê di baskan de rêxistinanê komelê sivîlî reyde zî ame yewca. Heyetî Torra Heqanê Komelkî û Polîtîkan (DIKTIO) ra Kurtovik Giana, Gianopulos Nikos, Rolhoizer Axim û Fares Antonisî reyde pêvînayîş kerd.

Avûkat Stefano Mannironiyî pêvînayîş de derheqê paradîgmaya Ocalanî de agahîyî dayî û bale ante têkoşînê hemparî ser. Hemserekê Rûmetî yê HDPyî Ertugrul Kurkçuyî zî bale ante hêrişanê kîmyewîyan ser. Gianopulos Nikosî îfade kerd ke tecrîdê vera Abdullah Ocalanî nêno qebulkerdene û vat: ''Ma hetê şarê kurdî de yê.''

Dima heyetî Koalîsyonê Çepê Radîkalî (Syriza) reyde pêvînayîş kerd. Ertugrul Kurkçu, Leyla Îmret, wekîla verêne Besîme Konca û  hunermend Eyup Duru zî tewrê pêvînayîşî bîyî. Serekê Komîsyonê Multecîyan Manolis Saris, pawitoxa heqanê merdiman û avûkatanê verênan ê Ocalanî ra Korina Repousi, Endamê Syriza Panos Lambrou û Wekîla Syriza ya PE Anneta Kavadia pêvînayîş de amade bîyî.

Pêvînayîş de Kurkçuyî derheqê tecrîdê Îmraliyî de, Besîme Konca zî derheqê asta faşîzmê AKP-MHPyî zî agahîyî dayî. Konca vist vîrî ke tewr zaf 6 hezar xebatkar û endamê HDPyî tepişte yê. Konca waşt ke Syriza vera polîtîkayanê Tirkîya wa têbigêra.

Anneta Kavadia venga Tirkîya da ke tecrîd sûcê merdimîye yo coka ganî biwedarna. Panos Lambrouyî zî ard ziwan ke Syriza keyeyê kurdan o û da zanayene ke Tirkîya eke  heqanê kurdan bida eşkena biba deokratîke.

Reyna vizêr çarçewa bernameyî de panelê bi nameyê 'Wextê ci yo-Ocalanî rê Azadîye, Kurdîstanî rê Haştîye' ame kerdene. Avûkatê Ocalanî Îbrahîm Bîlmezî panel qisey kerd û pare kerd ke Ocalan Îmrali de xoverdayîşêkê tarîxî keno. Bîlmezî vat ke wezîfeyê înan o verên azadkerdişê Ocalanî yo.

Keştîya Azadîye ewro do ver bi Îtalya Napoli bikewa rayîr.