Emîne Şenyaşara ke mêrde û di lajê ci hetê merdimanê Wekîlê AKPyî Îbrahîm Halîl Yildizî ra kişîyayî lajê xo Ferît Şenyaşarî reyde 319 rojî yo nobeta edaletî gêna. Seba ke nêweş a Emîne Şenyaşar keyeyê xo de nobete gêna la Ferît Şenyaşar verê Edlîyeya Riha de nobete de yo.

Ferît Şenyaşarî îfade kerd ke nobeta înan a edaletî binê zulmî de dewam kena û vat: ''Nobeta ma resaye serrêke.  3 rojî yo Riha de serdêko xidar esto. Şert û mercî senî benê wa bibê ma do têkoşînê xo ra fek vera medê. Ez venga pêro wekîlan dana ke qirkerdişî ra dima zulmê vera ma zêdîya. Ma ney qebul nêkenê. Pêro wekîlî qirkerdişî hol zanenê. Wa wekîlî terefê xo eşkera bikerê, kesê ke vera zulmî terefê xo eşkera nêkenê do bin bikewê. Heta ke edalet bêro caardene ma do têkoşînê xo rê dewam bikerê.''