Keyeyê Şenyaşarî: Ma do teslîmê tersî mebê

Keyeyê Şenyaşarî yo ke Nobeta Edaletî rê dewam keno pare kerd ke ê do teslîmê tersî nêbê.

Emîne Şenyaşara ke di laj û mêrdeyê ci 14ê hezîrana 2018î de hetê merdimanê Wekîlê AKPyî Îbrahîm Halîl Yildizî ra kişîyayî lajê xo Ferît Şenyaşarî reyde verê Edlîyeya Riha de nobeta edaletî rê dewam kena.

Seba ke nêweş a Emîne Şenyaşar roja 375. de nêeşkaye bêra verê edlîye la Ferît Şenyaşar verê edlîye de nobete rê dewam keno.

Keyeyê Şenyaşarî hesabê xo yê twitterî ser o mesajêk weşana û vat: ''Xîret û têkoşîn hêvîye awan kenê. Ma 375 rojî yo verê Edlîyeya Riha de seba edaletî têkoşîn kenê û bi mîlyonan merdimî wayîrê çalakîya ma vejîyenê. Ma do teslîmê tersî mebê.''