Platformê Kede û Demokrasîyî yê Dêrsimî xespkerdişê îradeyî protesto kerd. Çalakîye de operasyonê qirkerdişê sîyasîyî zî ameyî protestokerdene. Şaro ke Sûka Binerdî de ameyî têhet û ver bi şaredarîye rayra şîyî.

Ergin Tekinî ke bi nameyê platformî eşkerayîye daye û nê vatî: ''Hêrişê ke tarîxî ra vera Dêrsimî yenê kerdene ewro bi metodanê bînan dewam kenê. Nê caardişî dejanê şarê Dêrsimî reyna anê vîrî. La sey verî ewro zî şar vera heme zextan wayîrê îradeyê xo vejîyeno. Îqtîdaro ke vîjnayîşê 31ê adare de bin kewt wazeno muxalfetî vila bikero. Coka operasyonê qirkerdişê sîyasîyî yenê kerdene.

Seba ke vera derbaya qeyûmî vejîyayî Sezai Aksurek, Fethi Kaykaç, Veli Akyol, Aynure Can, Enes Boran û Şiyar Ataş ameyî tepiştene. Tepiştiş û destbendkerdişî vera têkoşînê kolektîfî yê şarî, nasnameyê ci yê kulturî, heqanê ci yê demokratîkan eşkera zext û cezakerdiş o.

Bi nê destbendkerdişan heme şarê Dêrsimî yeno hedef girewtene. La ê se kenê wa bikerî şarê Dêrsimî sey vizêrî ewro zî do wayîrê îradeyê xo bivejîyo. Qeyûm vera îradeyê şarî derba ya. Ganî caardişê qeyûmî û operasyonê qirkerdişê sîyasîyî bêrê vindarnayene.''

Eşkerayîye de Wekîlê DEM Partî yê Çewlîgî Omer Faruk Hulakuyî zî bale ante Terteleyê Dêrsimî ser û vat: ''Dêrsim memleketê Seyîd Rizayî yo û şarê Dêrsimî ewro zî vera zextan milê xo çewt nêkeno. Şarê Dêrsimî 90yan de vera torosanê sipîyan zî xover da.  Qeyûm talan û xesp o. Qeyûm vera demokrasîyî derbeya tewr gird a. Ma do vera qeyûman têkoşînê xo bidomnê. Şar heqê xo yê demokratîkî şuxulneno û wayîrê îradeyê xo vejîyeno. Tepiştiş û destbendkerdişê vera şarî bêhuqûqîye ya. Ganî qeyûmî û nê bêhuqûqîye cade biqedîyê.''