Qezaya Pasûrî ya Amedî de Wareyê Hesandinî de Şîrketa Bazirganîya Teberî û Madenkarîye ya Kupî 17 serrî yo gêrena madenî. Eşkera bibi ke raporê ÇEDî yê şîrketî laserê 2020î de pasîf bîyo. La şîrkete bi raporê ‘ÇED hewce nêkeno’ karê madenî rê dewam kena.

Serekê Komîsyonê Huqûqê Şaristanî û Xoza yê Baroyê Amedî û avûkat Ahmet Înanî qalê nê prosesî kerd, qanûnê madenî ercna.

Înanî da zanayene ke Hesandîn de parî ra nata têkoşînê seba pawitişê wareyî yeno kerdene û reya verêne Kurdîstan de têkoşînêko ekolojîk o hendê pîl yeno kerdene. Înanî vat: ‘’Eke raporêkê ÇEDî mîyanê panc serran de nêro şuxilnayene do derbazdar nêbo. Raporê ÇEDî yê şîrkete zî wina bi. La şîrkete Mudirîya Şaristanî ya Îklîm, Şaristanîye û Xoza ra raporê ‘raporê ÇEDî derbadar o’ girewt. No rapor durist nîyo. Sey Baroyê Amedî ma vera madenî dewa akerde. Dewa dewam kena.’’

Înanî îfade kerd ke raporê ÇEDî yê şîrkete laserê 2020î de çin bîyo û vat: ‘’Bê raporî kar nêeşkeno bêro kerdene. Nika şarê Hesandinî vera madenî çalakîye keno. Eke rayaumûmîye babete de nêrazîbîyayîşê xo bimojna mehkeme zî do bi tedaya ney bira raştikêne bida. Ma cara Hesandin de vera projeyanê sey GES û enerjî têkoşîn kenê.’’