Derheqê Festîvala  Kultur û Xoza ya  Dêrsimî ya ke emser mabênê 24-27ê temmuze de reya 23ine do bêro kerdene, vizêr Dêrsim de kombîyayîş ame kerdene. DEM Partî, Hemşaredarê Dêrsimî Cevdet Konak û Birsene Orhan ê ke wezîfe ra ameyî girewtene, DAD, DEDEF, EMEP, SMF, KESK û temsîlkarê Komeleya Dormeyî yê Munzurî tewrê kombîyayîşî bîyî.

Badê kombîyayîşê çarine ke detayê festîvale ameyî destgirewtene, eşkerayîye ameye dayene. Eşkerayîye de ame vatene ke  na festîvale têna aktîvîteyêke nîya; nameyê  xoverdayîşêk, bawerî û tewirêkî yo ke rixmê heme zextan payra yo û ame vengdayene ke wa hunermendî emser bêpere tewrê festîvale bibê.

Eşkerayîye de ame vîrvistene ke binê rejîmê qeyûmî de festîvale yena kerdene û nê ameyî vatene: ''Festîvala Munzurî tîcarî nîya. Zemînê paştdayîşê komelkî û kulturî yo. Coka tewrbîyayîşê hunermendanê do hêzê bido komelê ma. Ma zanê seba ke hunermendê ma paştî danê şarê xo malîyetêkê nê zî est o. La ma bawer kenê ke yewîye û paştdayîş têkoşînî xurt kenê. Xora huner ked a û kede qiymetin a. La ma semedê konserêkî û ya zî semedê aktîvîteyêka sehneyî veng nêdanê. No wayîrvejîyayîşê kulturê xo yo,paştdayîşê şarê xo yo. Coka ma hunermendanê xo yê erjîyayeyan ra wazenê ke wa emser bêpere tewrê festîvale bibê. No vengdayîşê têhetameyîşê huner û şarî, muzîkê kolektîfî, têhetameyîşê muzîk û haştîye, Munzurî rê nizdîbîyayîşî yo."