Kitabê Îdrîs Yazarî yo newe “Sînayoxa Axirzemanî“ Weşanxaneyê Vateyî ra vejîya. No kitabê dîyin ê şîîranê Îdrîs Yazarî yo. Verê cû zî Weşanxaneyê Roşna ra bi nameyê “Destê Zemanî“  kitabê xo yê şîîran ê verên vetîbî.

Îdrîs Yazar serra 1983 de dewa Mîyanî Bircîk de ame dinya. Mektebo verîn dewa xo de wend, mektebo nîyanîn YÎBOyê Mîyaranî de, lîse zî teber ra wende. 2014 de Unîversîteya Agirî de yew dewre şaxm Bazirganîya Teberî (Dış Ticaret) wend, la dima ca verda û Unîversîteya Munzurî de dest bi wendişê beşê Îngîlîzkîya Tetbîqî û Tercumanîye (Uygulamalı İngilizce ve Çevirmenlik) kerd, teber ra Unîversîteya Anadolu ya Eskîşehîrî de zî qismê Felsefe dewam kerd. 

Nuşteyê ey ê tirkî kovara Bezuvar de weşanîyayî. Serra 2011 de dest bi nuştoxîya kirdkî/kirmanckî kerd û êdî tirkî qet nênuşt. Nuşteyê ey ê kirdkî reya verêne rojnameyê Newepelî û kovara Şewçila de weşanîyayî.

Xebatê ey ke sey kitab weşanîyayê:

1-Îdrîs Yazar (Arêkerdox), Cimê Aşikan ra Hewt Hîkayeyê Gelêrî, Weşanxaneyê Roşna, Dîyarbekir, 2018, 80 rîpelî

2- Îdrîs Yazar, Destê Zemanî, Weşanxaneyê Roşna, Dîyarbekir, 2018, 56 rîpelî