Hemserekê Pêroyî yê Partîya Însan û Azadîye (PÎA) Ahmet Kayayî proseso ke bi vengdayîşê Rayber Apoyî û qedînayîşê têkoşînê çekdarî yê PKKyî ame destpêkerdene, ANFyî rê erjna.

Qiseykerdişê Kayayî ra qismêk wina yo: “Ewro PKKyî têkoşîno çekdar vindarna, bi na game mesele eşkena newera zemînê sîyasîyî de bêro destgirewtene û çareserkerdene. No hem semedê dewlete hem zî semedê komelî bertengêko muhîm o. La gerek ma hinî bizanê ke haştîye têna bi vindarnayîşê çekan nêbena. Çareserîya raşte aya ke serbûrkerdişo demokatîk bêro înşakerdene. Meseleya Kurdan têna sîyasîye nîya, eynî wextî de meseleyêka komelkî ya. Ziwanê medya û sîyasetî tansîyonî dahîna keno berz no gerek bêro bedilnayene. 

Meseleya kurdan têna sey meseleya ‘asayîşî’, sey ‘qedîyayîşê terorî’ destgirewtiş xelet o. Seba ke waştişê şarê kurdî yê heqdarî nêrê vînayene wina yeno nizdîbîyayene. Vatişê Tirkîyaya bêterorî bi zanayîş yada nêzanayîşî waştişanê heqdaran ê kurdan krîmînalîze keno. Xora zafê kurdan wazenê wa şîdet bêro qedînayene la eynî wextî de semedê heqê perwerdeyê ziwanê dayîke, hêzdarkerdişê îradeyê herêmî, temsîlîyeto demokratîk û heqanê winayênan têkoşîn kene.

Gerek dewlete verî waştişanê kurdan ê sey perwerdeyê ziwanê dayîke,reformê îdareyê herêmî, qirkerdiş û hêrişê ke vera kurdan kerdî nînan de têrîameyîş, hîrakerdişê warê sîyasetî bîyaro ca. Seba ke no proses bêro averberdene gerek her kes çarçeweya demokratîke de tehamul bikero. No demo ke ma tede yê hem firset hem zî rîskê ci est ê. Seba ke no firset bêro şuxilnayene gerek pêro hetî bitaybetî aktöre sîyasîyî bi berpirsîyarîye û cesaretî têbigêrê. Çareserîya raşte; bi vindarnayîşê çekan nê, bi qiseykerdişê sîyasetî û seyyewbînîya şaran bena.”