Serekê Meclîsî Numan Kurtulmuş û serekwekîlê komanê partîyan seba teqîbkerdişê prosesê çareserîya meseleya kurdan Meclîs de seba awankerdişê komîsyonî kom bîyî. Serekwekîlê komanê AKP, MHP, DEM Partî, CHP, ÎYÎ Partî û Yenî Yolî tewrê kombîyayîşî bîyî.

Kombîyayîş de pêro partîyan fikrê xo yê serê awankerdişê komîsyonî û pêşnîyazê xo pêşkêş kerdî. 

Partîyê sîyasîyî mîyanê hewteyî de pêşnîyazê xo yê serê komîsyonî pêşkêşê Serekê Meclîsî Numan Kurtulmuşî bikerê. Dima ke Kurtulmuş vernîyazî partîyan rê pêşkêş bikero komîsyon qetî do bêro awankerdene.

Kurtulmuş do ronîyayîşê komîsyonî îlan bikero. Komîsyon do 35 endaman ra bêro pê. 

Hema dîyar nîyo ke komîsyon hetê qanûnî ra yan zî hetêkê bînî ra bêro awankerdene. Na babete de nezelalî dewam kena. La DEM Partî israr kerd ke komîsyon ganî sey komîsyonêkê pisporî yan zî qanûnî bêro awankerdene.

ÎYÎ Partî ra ber partîyêka bîne vera awankerdişê komîsyonî tewirêko negatîf nêmojna.