Komîteya Şar û Bawerîyan a KCKyî bi wesîleya menga Muharemî eşkerayîyêke daye û venga pêro elewîyan da ke wayîrê komelê demokratîkî vejîyê û serkêşîya têkoşînê neteweya demokratîke bikerê.
Komîteya Şar û Bawerîyan a KCKyî bi wesîleya menga Muharemî eşkerayîyêke daye. Eşkerayîye wina ya:
‘’ Mîyanê atmosferêkê winayênî de ke çarçewa Vengdayîşê Rayber Apoyî de serebûtî qewimîyenê, şerê Îsraîl-Îranî yeno kerdene ma kewtî menga Muharemî. Na menge de ke Xoverdayîşê Kerbela yeno vîrardene, şehîdê Kerbelayî yenê yadkerdene ma hêvî kenê ke Rojeyê 12 Îmaman ê elewîyan û alemê Şîa û germîya îmaman bêrê qebulkerdene.
Xoverdayîşo ke serkêşîya Îmam Huseyînî de Kerbela de vera artêşa Yezîdî ameyo kerdene wayîrê manayêka tarîxî yo. Vera xanedanê emewîyan Muavîye û lajê ci Yezîtî no xoverdayîş xoverdayîşê pawitişê cewherê demokratîkî û komunalî bi. Vera zulm, neheqî, dişmenî û nêzdîbîyayîşanê îqtîdarperestan no xoverdayîşo pîl seba pawitişê cewherê komunalî yê komelkî û Îslamî ame kerdene. No xoverdayîş 1400 serrî yo dewam keno. Elewîyî bi hişmendîya xoverdayîşê Kerbela rojeyê xo gênê û loqmaya germîya îmaman pare kenê. Ma bawer kenê ke îbadet û duayê misilmananê şîayan zî hetê manaya Îslamê demokratîkî ra ercîyaye yê.
Bi destê temsîlkaranê sîstemê dewletperestî-îqtîdarperestî herêma ma vurîyena gola gonîye. Na cografya de xeylê qirkerdişê pîlî ameyî kerdene. Ewro zî yeno waştene ke Rojhelato Mîyanên bingeyê menfaetanê hêzanê hegemonîkan ê kapîtalîstan de newe ra bêro dîzaynkerdene. Şerê 20 serranê peyênan de herêma ma de bi desan mîlyon merdimî wareyanê xo ra bîyî. Na rewşe bi şerê Îsraîl-Îranî hîna bi giranî dewam kena.Seba Rojhelatê Mîyanênî tek çare sîstemê neteweya demokratîke yê Rayber Apoyî yo.
Nê dewrî de wayîrvejîyayîşê Xoverdayîşê Kerbela û Îmam Huseyînî wayîrvejîyayîşê çareserîya neteweya demokratîje yo, beşdarîya awankerdişê komelê demokratîkî ya. Wayîrvejîyayîşê vengdayîşê Rayber Apoyî, esaskerdişê xeta neteweya demokratîke û caardişê têkoşînê ney seba şar û bawerîyanê Rojhelatê Mîyanênî bi taybetî seba elewîyan erko bingeyîn o. Elewîyî tena bi nê hawayî eşkenê bawerîya xo bipawê û wayîrê şertanê cuya azade bibê.
Bi na wesîle ma şehîdanê Kerbela bi hûrmet û minetî yad kenê. Ma venga cananê elewîyan, hêzanê terefgîrê demokrasî û azadîye danê ke wayîrê Vengdayîşê Komelê Demokratîkî vejîyê û serkêşîya têkoşînê neteweya demokratîke bikerê.’’
