Muzîsyena ciwane Fatoşe Ereklîya ke Mannheim de wexto ke deyîra bi kurdkî vatêne raştê hêrişê nîjadperestî amebî gerre kerd. Fatoşe dîyar kerd ke ê do bi ziwanê xo yê dayîke vajê û çew nêeşkeno înan bitersnê.
14ê hezîrana 2025î de şaristanê Mannheimî yê Almanya de muzîsyena ciwane ya kurde Fatoşe Ereklî seba ke deyîra bi kurdkî vatêne raştê hêrişê cinîyêka nîjadpereste ya tirke amebî. Cinîya nîjadpereste bi qiseyê ‘’Şima nêeşkenê tîya de muzîkê bi kurdkî vajê, ziwanê bi nameyê kurdkî çin o.’’ hêrişê Fatoşe kerdibî.
Fatoşe bi qiseyê ‘’Eke ziwanêko winayên çin o, ti senî zanena ke ez ha bi kurdkî vana?’’
Serebût serê medyaya dîjîtale de vila bi. Merkezê Komelê Mezopotamya, Koma Cinîyan a Ronahî Bêrîvane û Wekîla Partîya Çepe Gokaye Akbulut mudaxeleyê serebûtî kerd. Nêweşxaneyo ke hêrişker tede xebitîyena ame agahdarkerdene.
Fatoşe gerreyê cinîya tirke kerd û waşt ke wa na nîjadperestîye bêceza nêmana.
Fatoşe vat: ‘’Rixmê nê hêrişan zî ma do tim bi ziwanê xo yê dayîke deyîranê xo vajê. Ganî ma nê nêzdîbîyayîşanê nîjadperestan rê vajê bes. Çew nêeşkeno ma bitersno.’’
