Paytextê Îngilîstanî London de vizêr polîsan eştbi Merkezê Komelê Kurdan ser û Hemsereka Meclîsê Şarê Kurdî Turkane Budak, xebatkarê MErkezî Ercan Akbal, sîyasetmedar Alî Poyraz, û xeylê kesê bînî destbend kerdbî. Merkez hema zî binê ablûqa de yo.

Polîsan vizêr waş ke dormeyê kuçeyê merkezî bi têlan bigêrê. La kurdîstanijan verê ney girewt. Naye ser o polîsan hêrişê girseyî kerd. Hêriş de xeylê kesî birîndar bîyî, 2 cinîyê kurdî wedarîyayî nêweşxaneyî.

Polîsî kesî nêzdîyê bîna nêkenê, tîmê antî-terorî û îstîxbaratê îngilîzan zî merkez de cigêrayîşî kerdî û dest na malzeme û belgeyanê merkezî ser. Kurdîstanijan bi qiseyê 'şerm bikerê' polîsî şermezar kerdî.

Kurdîstanijan û dostanê înan kuçe de verê bendê polîsan de xeyma xo akerde û deyîrî vatî. 

Rojnamegerê îngilîzî Mark Campbellî bi tûjî polîsî û hukmatê îngilîzan rexne kerdî û dîyar kerd ke PKKyî rûmetê merdimatîye vera DAÎŞî pawito. Markî venga kurdîstanijan da û vat: ''PKK seba şima çita yo.'' Girseyî zî vat: ''PKK şar o, şar tîya de yo.''

Verê merkezî de ablûqa zî xoverdayîşê kurdan zî dewam keno. Kuçe de seke Meclîsê Şarê Kurdî verê cû veng dabi Roşanê Gandarbîyayîşî ame fîrazkerdene. Girseyê şarî deyîranê Mîr Perwer û Merwan Şanî reyde verê merkezî de govende girewte.

Yewîya Hêzî ya Demokratîke ewro rayraşîyayîşêkî vera sereştişî bikera. Rayraşîyayîş do Îstasyonê Turnpike Line ra heta bînaya KCCyî dewam bikero û saete 17.00 de dest pêbikero.