Emîne Şenyaşara ke mêrde û di lajê ci hetê merdimanê Wekîlê AKPyî Îbrahîm Halîl Yildizî ra kişîyayî lajê xo Ferît Şenyaşarî reyde verê Edlîyay Riha de nobeta edaletî kena. Keyeyî roja 226. de serê sibayî verê Edlîyeya Riha de pankarta bi nuşteyê 'Ma edaletî wazenê' akerde û dest pê çalakîya xo kerd.

Keyeyî hesabê xo yê medyaya dîjîtale de vat: ''Kesê ke nêweşxane de qirkerdiş kerd cayê înan Meclîs nîyo. Wa Komîsyonê Cigêrayîşî yê Meclîsî bêro awankerdene. Bi hawayêkê hîrayî serê qirkerdişî de vindero.''

Ferît Şenyaşarî zî ard ziwan ke wekîl Yildizî û merdimanê ci hêrişê înan kerd la derheqê înan de dewa nêameye akerdene. Şenyaşarî vat: ''Semedo ke qirkerdiş de wekîl û merdimê ci estê dewa nêna akerdene. Dozger û dadgerî bêveng ê û hemkarîya sûcî kenê.''

Ferît Şenyaşarî bale ante ser ke qirkerdiş 3 serrî û 4 mengî verî qewimîya la Meclîs de qet yew cigêrayîş nêame kerdene. Şenyaşarî vat: ''Ez venga wekîlan dana ke bêveng mebê. Wa huqûq bêro caardene.''