Emîne Şenyaşara ke laj û mêrdeyê ci hetê merdimanê Wekîlê AKPyî Îbrahîm Halîl Yildizî ra kişîyayî lajê xo Ferît Şenyaşarî reyde 120 rojî yo verê Edlîyeya Riha de nobeta edaletî kenê.

Xoverdayoxê Kuçeyê Yukselî Merve Demîrel û kênaya Edîbe Ozçelîka ke sereştişê polîsan de krîzê qelbî ra merde, Fîlîze Ozçelîk keyeyê Şenyaşarî zîyaret kerd.

Merve Demîrel pare kerd ke îqtîdarê AKPyî şarî rê bêedaletîye ferz keno coka şar zî xo ver dano. Demîrele vat: ''Sebebêk çin o ke Keyeyê Şenyaşarî xo ver medo. Zîyaretî eşkenê rîyê Emîne Şenyaşar şay bikerê, hêz danê ci. Ma venga pêro kesanê rûmetênan danê ke bêrê verê Edlîyeya Riha û paştî bidê keyeyî. Eke ma yew bibê eşkenê edalet bîyarê ca.''

Fîlîze Ozçelîk da zanayene ke nobeta înan a edaletî hewteyê 71. de dewam kena û îfade kerd  ke wa her kes wayîrê Keyeyê Şenyaşarî vejîyo.

Ferît Şenyaşarî zî wina qisey kerd: ''Pa dadîya mi têkoşînê ma dewam keno. Ma pê paştdayîşî tîya de yê û her roje no paştdayîş beno pîlêr. Eke ma têkoşînê xo pîlêr bikerê, edalet do bêro caardene. Ma seba paştdayîş û destekê huqûqî her kesî dewatê tîya kenê.''