Emîne Şenyaşara ke di laj û mêrdeyê ci hetê merdimanê Wekîlê AKPyî Halîl Îbrahîm Yildizî ra 9ê adara 2021î de ameybî qetilkerdene, lajê xo Ferît Şenyaşarî reyde roja 630. de Nobeta Edaletî rê dewam kena.

Ferît Şenyaşarî Nobeta Edaletî de qisey kerd û vat: ''Têkoşînê ma yê edaletî yo ke ma dadîya xo reyde dabî destpêkerdene 630 rojî yo verê Edlîyeya Riha de dewam keno. Pêro partîyê Meclîsî têkoşînê ma yê edaletî teqîb kenê. Nêzdîyê di serran o verê edlîye bîyo keyeyê ma. Ma amade yê ke her kesî de pêvînayîş bikerê û waştişanê xo vajê.''