Keyeyê Şenyaşarî serê sibayî verê bînaya Mehkemeya Îstînafî ya Dîlokî de dowîzî akerdî û avûkat Bulent Duranî reyde eşkerayîye daye.

Eşkerayîye de Ferît Şenyaşarî qisey kerd û vat: ''Vera dikanê ma hêriş ame kerdene. Nêweşxaneyê Dewlete yê Pirsûsî de 3 merdimê ma bi hawayêkê barbarî ameyî kiştene. La wekîlê îqtîdarî nêame muhakemekerdene. Birayê ma Fadil Şenyaşarî rê de ceza dîyaye û 4 serrî yo o hucreyê yewkesî de tepişîyeno. Bire nika Mehkemeya Îstînafî de ya. Dadîya xo reyde ma do ewro nobeta xo rê tîya de dewam bikerê. Ma do biwazê ke heyetê bire reyde pêvînayîşî bikerê. Ma do qala na neheqîye bikerê. Heta ke edalet bêro caardene ma do têkoşînî rê dewam bikero.''

Eşkerayîye ra dima keye seba ke waştişnameyê îtîrazî yê seba veradayîşê Fadil Şenyaşarî bido avûkat Bulent Duranî reyde derbazê Edlîyeya Dîlokî bi. 

Şubeyê Dîlokî yê Komeleya Huqûqnasan a Seba Azadîye (OHD) keye zîyaret kerd. Temsîlkarê OHDyî Mustafa Yalçinî da zanayene ke ê sey OHDyî tim hetê keyeyî de yê.

Hetê bînî ra keyeyê Şenyaşarî waşt heyetê mehkeme bivîno la heyetî waştişê keyeyî red kerd.