Ugur Taşdevîreno ke Zîndanê Kîlîsî de tepişîyeno keyeyê xo rê bi telefonî pare kerd ke ey û di tepişteyanê bînan Huseyîn Osmanpûr û Huseyîn Aydinî vera îşkence û binpaykerdişê heqan dest pê grevê vêşanîye kerdo.

Teşdevîrenî ard ziwan ke zîndan de têna 4 tepişteyê sîyasîyî est ê û înan rê 'payan ser de hûmaritiş' yeno ferzkerdene.Taşdevîrenî da zanayene ke gardîyanan înan rê gefî wendî û tepişte Îhsan Îyînç zî bêsebeb berdo hucreyê yewkesî. Goreyê Taşdevîrenî gardîyanan vato 'heta ke Îyînç nêame tepişteyî vera ma nêvejîyayêne, ey sîstemê ma xera kerd.'

Taşdevîrenî dîyar kerd ke eke îşkence nêqedo û Îyînç hucreyê yewkesî ra nêro vetene ê do rojeyê mergî bikerê. Taşdevîrenî venga Komeleyanê Heqanê Merdiman (ÎHD) û rêxistînanê bînan da ke wa heyetêk bişawê zîndanî.