Tepişte Onur Yilmaz bi bahaneya 'asayîşî' 2ê teşrîna verêne de Zîndanê Kirikkale ra sewqê Zîndanê Buca yê Îzmîrî ame kerdene. La sewqkerdişî de kincê ci nêdîyayî ey.

Yilmazî pê telefonî keyeyê xo reyde qisey kerd û qala binpaykerdişanê heqanê zîndanî kerde. Yilmazî da zanayene ke roja sewqkerdişî ra nata o hucreyê yewkesî de tepişîya û semedo ke kincê ci nêdîyayî ey heman kincî bi rojan dayî xo rê. Yilmazî îfade kerd ke o beşê cêrenî de ame cakerdene û penceraya ci pê telan gêrîyaye.

Yilmazî pare kerd ke rewşa 5 tepişteyanê bînanê ke sewqê Buca bîyî heman a û ê do dest pê grevê vêşanîye bikerê. Yilmazî venga pawitoxanê heqanê merdiman da ke zîndanan de cigêrayîşê binpaykerdişê heqan bikerê.