13ê kanûne de Amedîyê de hêzanê PDKyî hêrişê gerîlayanê HPGyî kerdbi û netîce de 2ê ci giranî 3 gerîlayî birîndar bîyî.

Hemserekê KNKyî Ahmed Karamûsî ANFyî rê qisey kerd û venga terefan da.

Karamûsî vat: ''Ganî wird terefî zî xo provakasyonan ra dûrî bigêrê û bi mesuldarî têbigêrê. Ganî wird terefî zî abigêrê cayanê xo yê verênan û pê dîyalogan mesele çareser bikerê.Ma seba dîyalogan veng danê. Çunke no şer do pêro Kurdîstanî ra vila bibo. Şero muxtemel do kurdan ra fayde nêkero. No şer do têna xizmetê dişmenî bikero. Ma venga PKK û PDKyî , venga pêşmerge û gerîlayan danê ke no şer do destkewteyanê kurdan çin bikero. Ma venga partî, dezgehanê çar parçeyanê Kurdîstanî û teberê welatî danê ke haştîye û biratîye teşwîq bikerê. Vateyê tûjî û eşkerayîyê winasênî xêrê destkewteyan nîyê. Tek rayîr dîyalog û pêvînayîş o. Bi hawayêkê eşkerayî ma venga pêşmerge û gerîlayan danê ke şerî ra abigêrê. Gonîya way û birayanê xo merijê.''

Karamûsî bi taybetî venga Serekê PDKyî Mesûd Barzanîyî da û vat: ''Ganî seba haştîye o zî rolê xo bîyaro ca û şerê zereyî vindarno.''

Karamûsî bale ante zîyaretê înan ê Başûrê Kurdîstanî ser û îfade kerd ke înan PDKyî ra ber pêro partîyan de pêvînayîşî kerdî. Karamusî vist vîrî ke PDKyî hema zî cewab nêda vengdayîşanê pêvînayîşî.

Karamûsî vera eşkerayîyanê Serekwezîrê Herêma Kurdîstanî nêrazîbîyayîşê xo mojna û vat: ''Ma nê tewirî qetî qebul nêkenê. Eşkerayî û tewirê Mesûd Barzanîyî vera PKKyî dişmenîye kenê. Eke gerîla û pêşmergeyî şer bikerê bingeyê yewîya kurdan do birijo, destkewteyê ma do destê ma ra şorê. ''