Koalîsyonê Mîyanneteweyî yê vera DAÎŞî Iraq de heme aktîvîteyê xo vindarnayî. Badê hêrişê vera baregehê leşkerî û sersefîrîya  DYA yê ke vizêr ameyî kerdene, koalîsyonî zî falîyetê perwerdeyî yê leşkeranê Iraqî vindarnayî.

Koalîsyonî eşkerayîyêk dayî û nê pare kerdî:  Seba ma çîyo tewr girîng asayîşê hêzanê ma yê koalîsyonî yê ke herême de yê. Hetê Katîp Hîzbullahî ra di menganê peyênan de hêrişanê bi roketan de sivîlê DYAyijî û leşkerê Iraqî merdî. Koalîsyonî bale ante ser ke gureyê înan o verên pawitişê baregehanê leşkeranê Iraqî yê ke leşkerê koalîsyonî tede yê yo û vat coka war de perwerdekerdişê hemparanê û kapasîteyê têkoşînê ma yê vera DAÎŞî bêro vindarnayene.

No qerarê koalîsyonî û qerarê leşkeranê DYA Iraqî ra vertişî yê parlamentoyê Iraqî raştê heman wextî ameyî.