Wekîla HDPyî û Endama Komîsyonê Heqanê Merdiman Gulistane Kiliç Koçyîgît pare kerd ke tecrîdê Îmraliyî pêro zîndanan ra vila bîyo. Koçyîgîte ard ziwan ke grevê vêşanîye yê tepişteyan seba tecrîdî hîşyarî yê.

Wekîle Koçyîgît faşîzm Tirkîya de bîyo umûmî û vat: ''Bi taybetî hukmatê AKPyî ra dima Tirkîya de rejîmêko newe ronîya. AKP bi dewlete û rejîmo dînperest. Nê qewimîyayîşan tesîrê pêvînayîşê Birêz Ocalanî, çareserîya meseleya kurdan û komelanê Tirkîya kerd. Tewr zaf zî Zîndanê Îmraliyî binê nê tesîrî de mend. Şarê kurdî Birêz Ocalan sey îradeyê xo vînenê. Vera Ocalanî konseptêko taybet yeno caardene. Nîşaneya bingeyî ya polîtîkayanê şerî yê AKPyî, polîtîkaya çarenêkerdişê meseleya kurdan, tecrîdê Îmraliyî yo.''

Koçyîgîte da zanayene ke tecrîd têna Îmrali de nîyo û vat: ''Tirkîya vera bena otorîter û demokrasî ra dûrî kewena. Wedaritişê tecrîdî do meseleyanê Tirkîya zî çareser bikero. Îmrali merkezê meseleyanê Tirkîya yo. Heta tecrîd nêro wedaritine, kerdişê vera kurdan nêqedîyê azadî, haştî û demokrasî do nêrê nê welatî û heqê merdiman zî do bêrê binpaykerdene.''

Koçyîgîte grevê vêşanîye yê tepişteyan vist vîrî û vat: ''Xeylêk sebebê grevê vêşanîye estê; tecrîd zî înan ra yew o. Qedexekerdişê pêvînayîşî, kêmkerdşê saetanê pêvînayîşî zî sebebanê nê grevî ra yê. Ganî rayaumûmîya Tirkîya nê grevê vêşanîye sey hîşyarîyêke bivîna. Grevê vêşanîye yo ke binê şertanê janî de yeno kerdene tehlukeyanê pîlan xo reyde do bîyaro. Ganî hukmat bi lezî derheqê grevê vêşanîye de tedbîran bigêro û verî ke grev vurîyo bêdem ganî tay gaman bierzo.''