25ê hezîrana 2012î ra nata verê Konseya Ewropa ya Strasbourgî de semedê azadîya Rayberê Şarê Kurdî Abdullah Ocalanî Nobeta Azadîye yena tepiştene. Nobeta ke nuqtaya mabênê dezgehanê Ewropa de yena tepiştene her hewte hetê komayanê cîya cîyayan ê kurdan û dostanê înan ra yena domnayene.

Heteyê 491. de nobete hetê koma Stuttgartî ra ameye dewrgirewtene. Kome de Pempeşah Ozman, Sebahate Koçin, Sarya Rojhilat, Hamit Bilig, Mehmet Bilici ca genê.

Mehmet Biliciyî ke bi nameyê kome qise kerd bale ante bêvengîya welatanê Ewropa ser û vat: ''Dewleta tirke vera Rayber û şarê kurdî sûcanê merdimîye kena la Ewropa ra qet veng nêvejîyeno. Tecrîd yeno xorîkerdene û vera gerîlayan û şarê sîvîlî çekê kîmyewîyî yenê şuxulnayene. Rixmê heme hêrişanê vera kurdan qet dezgehêko eleqedar semedê cigêrayîşî çîyêk nêkeno. Hukmatê Ewropa pê bêvengîya xo benê hemkarê sûcanê dewleta tirke. Ma sey şarê kurdî heta azadîya fîzîkîye ya Rayber Apoyî do têkoşîn bikerê.''