Wezîrê Karanê Zereyî yê Fransa Gerald Darmaninî eşkera kerd ke Komeleya Baraka City û 51 bînayê ci ameyî girewtene.  Komele bi 'têkilîya îslamê radîkalî' û 'peydakerdişê bahaneyan ê seba çalakîyan ê terorîstan' ameyêne sûcdarkerdene.

Serekê komele Îdrîs Sîhamedîyî bi hawayêkê kifşî venga Erdoganî da ke heqê multecîtîye bido ey, komele û tîma ey. Yeno vatene ke beno ke komele merkezê xo bihewilna Tirkîya.

Baraka City nêzdîyê Îhvan-i Muslîmîn a. Serekê komele Îdrîs Sîhamedî heyranê Erdoganî yo û seba hêrişanê terorîstan înternetî ser o bahaneyan vila keno. Sîhamedî heyranîya xo ya seba Tirkîya nênimneno û medyaya dîjîtale ser o tim eşkera keno.

Wexto ke Sîhamedî amebi destbendkerdene zî têna Tirkîya vera Fransa vejîyabî. Ajansê Anadoluyî zî 22ê adara 2020î de xeberêka xo de vat ke Tirkîya mîlyonêk maske erşawite Fransa. La maskeyî erşawîyayî Baraka City.

Wexto ke dewleta tirke Efrîn îşxal kerd Sîhamedîyî hetkarîye erşawite komanê cîhadîst û îşxalkera. Adara 2020î de Sîhamedîyî twitterî ra vila kerd ke Baraka City Efrîn de ya.

Qerarnameyê batalkerdişê Baraka Cityî de yeno vatene ke na komele 'şubeyêkê Tirkîya yo'. No şube hetê hemwelatîyê Fransa-Tirkîya Mehmed Uzunî ra yena îdarekerdene, Uzunî xeylêk caran sûcê edlîyî kerdî û paştî daye cîhadîstanê Iraq û Sûrîye.

Fransa de awanîyê tirkan ê ke tede ajanî, nîjadperestî û tetîkkeşî zîl danê, nêqefilîyayî. Mîyanê înan de partîyê pabesteyê AKPyî, camî û komeleyî zî estê. Hamnan de nîjadperestanê tirkan bi tekbîran hêrişê armanîyan kerdbi. Reyna 28ê teşrîna verêne de nîjadperestanê tirkan Lyon de hêrişê armenîyan kerd. Dîmenê hêrişî bîyî sebebê nêrazîbîyayîşan ê pîlan.

Nê awanîyê dewleta tirke hem Fransa de cayê xo kenê xurtêr hem zî vera muxalîfanê surgunkerdeyan teror kenê. Têna Fransa nê welatanê bînan ê Ewropa zî vera nê kerdişan tedbîrî nêgirewtî. La ame parekerdene ke 'qanûnê  cîyakerîya îslamî' do Fransa de verê artêşa îmaman a Erdoganî bigêro.