Komeleyanê elewîyan hêrişê vera Gaxanî şermezar kerd

Endamanê Îdareyê Komeleya Kultur û Paştdayîşî ya Dêrsimî derheqê destbendkerdişanê fîrazkerdişê Gaxanî de kombîyayîşê çapemenîye kerd û waşt ke êyê ke ameyî girewtene wa bêrê veradayene.

Fîrazkerdişê Gaxanî yê Taxa Gazî de polîsan hêrişê fîrazkerdişî kerdbi û Serekê Komeleya Dêrsimijan Haydar Altun, Serekê DEDEFî Alîhaydar Ben û endamê komele Sînan Candan, Zelale Konak, Onur Narîn û Ferît Alîşîr bi derbkerdişî destbend kerdîbi. Komeleya Kultur û Paştdayîşî ya Dêrsimî, Şubeyê Komeleyanê Elewîyan ê Demokratîkan, Federasyonê Meclîsanê Sosyalîstan Şubeyê Îzmîrî yê Komeleya Heqanê Merdiman (ÎHD) de ameyî pêser û vera hêriş û destbendkerdişanê fîrazkerdişê Gaxanî nêrazîbîyayîşê xo mojna.

Eşkerayîya hempare hetê Endamê Îdareyê Komeleya Paştdayîşî û Kulturî ya Dêrsimî Alî Ekber Coşkunî ra ameye wendene. Coşkunî îfade kerd ke fîrazkerdişê Gaxanî yê Taxa Gazî de polîsan hêrişê Gaxanî kerd û kesê ke destbend kerdî derb kerdî.

Eşkerayîye wina ya: ''Ma nê hêrişî yo ke vera erjanê ma yê komelkîyan, îdarekaran û endamanê ma ame kerdene şermezar kenê. Ma wazenê ke kesê ke ameyî destbendkerdene cade bêrê veradayene. Gaxan tradîsyonê ma yo qedîm o. Hem cografyaya Dêrsimî de hem zî cografyaya elewîyan de manayêka ci ya fîraze esta. Polîtîkayê teda yê vera waştişanê ma yê demokratîkan hînî vera fîrazkerdişanê ma yê tradîsyonelan zî yenê kerdene. Hêrişê vera fîrazkerdişan, destbendkerdişan rewşêka zaf biqesawet a. Kulturê elewîyan û dêrsimijan sey kulturê bînan parçeyê nê welatî yê. Ma kesêkî ra lutuf nêpawenê. Heqê kesî çin o ke hêrişê ercanê ma, kulturê ma biko. Gaxan nameyê destpêkerdişî, hêvîyan, xoza û cuya hatîyane yo. Ma nê hêrişî şermezar kenê. Ma wazenê ke Gaxan bibo wesîleya şayî û haştîya şaran û dinya. Ma venga şarê xo danê ke her ca de bi hawayêkê xurtî wayîrê Gaxanî û ê erjanê xo yê bînan bivejîyê."