Partîya Çep a Keske Anqara de bi terwbîyayîşê 800 delegeyan semedê Konferansê Pîlî kom bîye. Konferans bi şîarê “Rêxistin Azadî ye” Merkezê Kulturî yê Nazim Hikmetî de yeno kerdene. Konferanso ke 800 delegeyî tewrê ci bîyî de sloganê sey “Biji Serok Apo” û “Biji Berxwedana Kobanê”  ameyî vatene.

Koferans do di rojî dewam bikero. Konferans de pêşnîyazê ke kombîyayîşanê şarî de vejîyayî vernî do bêrê muneqeşekerdene. Konferans bi vîjnayîşê dîwanî rêzgirewtişî ame destpêkerdene.  Qiseykerdişê akerdişî hetê vervatoxanê Partîya Çep a Keske Îbrahîm Akin û Çîgdeme Kiliçgun Uçar ra ame kerdene.

Îbrahî Akinî sîyasetmedarê ke zîndan de sey rehîn yenê tepiştene selam kerdî û vat: ''Polîtîkaya tecrîdî ewro her hetê welatî ra vila bîya. Rayîrê ma Rayîrê Hîrêyinî yo.  No rayîr semedê ameyoxê heme kesanê bindestan muhîm o. Vera nê sîyasetê zurker û talankerî bêveng memanê. Semedê heqê demokratîkî yê her kesî ganî vera nê polîtîkayan sere bêro wedaritene. Ma bi tewrbîyayîşê des hezaran kesan kombîyayîşê şarî kerdî. Ma do goreyê nê raporan xerîtaya xo bewlî bikerê.''

Çîgdeme Kiliçgun  Uçar zî vat:  ''Meseleya kurdan meseleya înkar û îmha ya. Têna biewnê nê kerdişanê des rojanê peyênan ra. Cenzayê domananê şarê ma zereyê qutîyan de ameyî dayene. Îqtîdar şero bêehleq rayra beno. Rojanê ravîyarteyan de kincê vêşayeyî yê kênaya Dayîke Taybete ya ke cenazaya ci hewt roje erdî de mende, Heznî Înan zereyê poşêtekî de teslîmê keyeyê ci bîyî. Ganî rojedemê ma yo tewr esas û raşt no bi. Heta ke verê nê mero girewtene ne kurdî eşkenê biresê hedefê xo ne zî tirkî. Ma tîya ra veng danê berpirsîyar û îqtîdarî ; ê mezelî tarîxê şarê kurdî yê, ê mezelî tarîxê ma yê. Reyna zîndanan de zilm est o, vera Rojawanî hêrişî yenê kerdene. Xora tecrîd bi xorîbîyayîşî dewam keno. Nê pêro pabesteyê meseleya kurdan ê.''