Kongreya KNKyî: Ma vera hêrişan Kurdîstanî bipawê

Kongreya KNKyî de semedê pîlkerdişê têkoşînê vera tecrîdê Îmraliyî û hêrişanê îşxalî yê dewleta tirke ame vengdayene.

Kongreya Neteweyîye ya Kurdîstanî (KNK) kongreya xo ya 21. bi tewrbîyayîşê bi seyan delege û temsîlkaranê partîyanê sîyasîyan ê kurdîstanî  daye destpêkerdene. Kongre do heta roja yewşemeyî dewam bikero.

Hemserekanê KNKyî Zeynepe Murad û Ahmet Karamusî ke qiseykerdişê akerdişî kerd ard ziwan ke ganî vera îşxalkeran tewiro neteweyî bêro girewtene.

Hemserekê  KONGRA-GELî Remzî Kartalî ke kongre de qisey kerd semedê xurtkerdişê têkoşînî veng da û vat: "Heta rijanyîşê sîstemî û statuyê Lozanî yo ke kurdan çîn hesibneno do têkoşînê ma dewam bikero. Heta azadîya şarê xo ma do heta peynî xover bidê. Ewro çar perçeyanê Kurdîstanî de têkoşîno xurt est o. Ganî heme partîyê kurdîstanî paştî bidê nê têkoşînê şarî. PDK rixmê heme vengdayîşanê Têgêrayîşê Azadîye yê Kurdîstanî hemverê têkoşînê kurdan de vindeno.Gerîlayî, Rayber Apo û şar têkoşîn kenê. Şorişê ke Rojawanî de dest pêkerd, ewro Rojhelat de dewam keno. Têkoşînê cinîyan ê kurdan cinîyan ê dinya rê serkêşîye keno. Dewletê herême têşîyenî. Na mîjdanêka gird a, heyecan dana. ”