Kongreya Starî NY bi hawayêkê pêtî rexne kerd: Ganî rolê xo bîyarê ca

Kongreya Starî venga Neteweyanê Yewbîyayeyan da ke nêbê hemparê sucanê vera merdimîye yê ke Dewleta Tirkan a îşxalkere kena û vat ke sînor hetê hêzêkê hîreyinî ra bêro pawitene û warê hewayî yê Rojawanî seba perayîşan bêro qedexekerdene.

Koordînasyonê Konreya Starî bi beyanatêkî bale ante sucanê Dewleta Tirkan a îşxalkere yê ke Vakur û Rojakewtena Sûrîye de vera merdimîye kena ser û venga Neteweyanê Yewbîyayeyan da.

Beyanatî ra tayî cayî wina yê:

"9ê teşrîna verêne ra heta ewro Dewleta Tirkan û cergê aye bi nameyê Artêşa Mîllîye bêmabên hêrişanê xo yê Vakur û Rojhelatê Sûrîye dewam kenê. Verî ke hêrişê îşxalî dest pêbikê zaf komelan vera tewiran û beyanatan venga Neteweyanê Yewbîyayeyan da. NYyî têna ge ge beyanatî dayî la seba ke hêrişî bêrê vindertene beyanatêko rastikên nêda û seba naye hêzê asayîşî yê mîyanneteweyî zî wezîfedar nêkerd. NY eşkayêne seba her kesî rolê demokrasîyî bigêrê xo milî û mîsyonê xo û berpirsîyarîya xo bîyarê ca.

Artêşa Tirkan Serêkanîye de sucê şerî kerdî, bi çekanê kîmyewîyan hêrişê domanan û sivîlan kerd. Bi des hezaran kesî mîyanê di-hîrê rojan de warê xo ca verdayî. Hemsereka Partîya Demê Ameyoxî ya Sûrîye Hevrîne Xelef bi hawayêkê barbarî ameye qetilkerdene. Îşkence bi cenaza şerwanêka YPJyî ame kerdene. Xebatkarê weşîye ameyî qetilkerdene.Girê Sipî de 3 karmendê weşîye hetê cergan ra ameyî remnayene û kiştene. Keyeyê sivîlan ameyî talankerdene.

Kifşo ke na herêma ke Dewleta Tirkan tira vana ''korîdorê asayîşî'' aslê xo de korîdorê qirkerdişê etnîkî yo. Ganî NY vera nê qirkerdişan tebvigêrê. Labelê beyanatê Sekreterê Pêroyî yê NY Antonio Guterresî dişmenîya şaran kenê xorîn û qirkerdişanê etnîkan ê ke armancê ci vurnayîşê demografîyî yo tesdîq kenê. Ma sey cinîyan, nê tewir û polîtîkayanê NY qebul nêkenê û nînan şermezar kenê. Ma sey cinîyanê herêma Vakur û Rojhelatê Sûrîye venga NY danê ke wezîfeyê xo bîyarê ca hemparê nê sucan nêbê, çarenusê şaran seba ekonomîyî qurban mekê. Ma venga NY danê ke polîtîka û caardişanê cidîyan bikê. Nê esasan ser o ganî asayîşê sînorî sey NY hetê hêzê hîrêyinî ra bêro pawitene û warê hewayî yê Vakur û Rojhelatê Sûrîye seba perayîşê teyarayan bêro qedexekerdene.''