Merkezê Cigêrayîşanê Sîyasî û Komelkî (SAMER) pêroyê Tirkîya de seba ke fîkrê peyênî yê vîjnayoxan bimuso mabênê 21-28ê hezîrane de anket kerd.

SAMERÎ ke netcîyê anketî eşkera kerdî vat înan Îstanbul, Îzmîr, Anqara, Adana, Agiri, Êlih, Bedlîs, Amed, Dîlok, Qers, Mêrdîn, Riha, Wan, Antalya, Konya, Bursa, Mugla, Samsun û Artvîn de 8 hezar kesan reyde online û telefonî ser o pêvînayîş kerd ke zafê înan cinî bî.

Goreyê netîceya anketî Îtîfaqê Cumhurî helîyeno û rayê muxalefetî zêdîyenê. Persê şima wazenê reya xo bidê kamî rê Se ra 29,3î  vat ''AKP'', se ra 27î vat ''CHP'', se ra 12î vat ''İYİ Parti'', se ra 11,6î vat ''HDP'', se ra 6,5î vat ''MHP'', se ra 2,9î vat ''Partîya Deva'', se ra 1,2î vat ''Partîya Ameyoxî'',  se ra 0,2î zî vat ''Partîya Saadetî''.

Koordînatora SAMERî Yuksele Gença ke netîceyê anketî ercnayî ard ziwan ke rayrapêroyîye hem îqtîdar hem zî muxalefetî ra memnûn nêyo. Gençe vat: ''Rixmê nayî rayê îqîtdarî yenê war û yê muxalefî şinê dîyar. Vîjnayoxî mesaj danê  muxalefetî ke wa rolê xo kay bikero. Teselê şarî îqtîdarî ra kewto, coka çimê ci muxalefetî de yo. Goreyê anketî problemê awbendî yê HDPyî çîn o û şar polîtîayanê ci ra memnûn o. Şar wazeno prosesê krîzî ra vejîyo. Se ra 60î yê şarî hêvîya xo îqtîdarî ra birnaya. Seba ke şar vera îqtîdarî dekerde yo rayê nêrazîbîyayîşê vera îqtîdîarî dîyenî muxalefetî. Coka muxalefet ganî wayîrê nê reyan vejîyo û wezîfeyê xo bîyaro ca.

Vera Îtîfaqê Cumhur û Şarî îtîfaqo alternatîf hewce keno.  Se ra 16î yê şarî wazeno ke HDP, CHP û Deva îtîfaqo newe bikerê. Vîjnayoxê zanayeyî zanê ke HDP û kurdî semedê dîzaynê muxalefetî rolo kîlît kay kenê. Goreyê anketî îtîfîqî nêeşkenê têna bibê îqîtar coka wird îtîfaqî zî hewceyê reyanê HDPyî yê. Rayê AKP û MHPyî çend şino yenê war. Nayî de tesîrê qiseykerdişê Sedat Pekerî esto ke her roje gureyê qîtîdarî yê leyminî yenê eşkerakerdene. Ma nika vînenê ke rayê AKPyî se ra 29 û yê MHPyî zî se ra 6 ê. AKP rîyê nêzdîbîyayîşê xo yê vera meseleya kurdî Kurdîstan de zaf ginayo war. rayê ci se ra 13 tîya kêm bîyî. Zafê vîjnayoxê HDPyî nêwazenê ke îtîfaq bikero la vanê bikero zî peyê partîya xo de yê. Paşta vîjnayoxanê HDPyî înan ra pêt a. Ê zanê ke HDP biqefilîyo zî nêqefilîyo zî ê rolê kîlît kay kenê.''