Hetkara Hemserekan ê Pêroyînan a HDPyî Şazîye Kose pê eşkerayîyêke vat: ''Îqtîdar û sermaye herinda ke peyê firsendan de gêrenê ganî cade tedbîran bigêrê.''

Eşkerayîye de wina ame vatene: ''Rejîm û îqtîdarê Tirkîya gem berpirsîyarê peygoşîye yê hem zî tecrubeyanê dinya yê vera vîrusê Korona ders nêgênê. Bi vatişê 'Wa her kes rewşa xo ya îstîsnayîye bîyaro ca' berpirsîyarîye dîyena milê şarî.

Eşkera yo ke Tirkîya do biba sey Îtalya û Îspanya. Beno ke rewşa Tirkîya înan ra xirabêr zî biba. Eke bi nê hawayî dewam bikero felaket fekê berî de yo.''

Eşkerayîye de ame waştene ke seba karkeranê înşaatî nê tedbîrî bêrê girewtene:

-Her şaristan de ke tede karkerê şantîye estê merkezê karantîna bêro awankerdene û krîterê 14 rojan bêro caardene.

-Dima ke wextê karantîna qedîyena umûmîye destûranê ganîyîyan bida ke karkerî şorê keye.

-Ganî qedexe bibo ke karkerî karî ra bêrê vetene û înan rê destûro bipere zî bêro dayene.

-Weşîye, werd, hîjyen û lojîstîkî ra berî ganî pêro sektorî cade berardişê xo vindarnê.