Ekonomî ra Mesuldare Hetkara Hemserekanê Pêroyîyan ê HDPyî Şazîye Kose derheqê krîzê ekonomî de ANFyî rê qisey kerd.

Kose pare kerd ke 2021 de îqtîdarê AKP-MHPyî şar mîyanê zêdînayîşê vayan û bacan de verdayo û vat: ''Enflasyon se ra 82 o. Na rewşe de meaşê karmendan se ra 30, meaşê asgatî se ra 25 ame zêdînayene. Wina aseno ke nê polîtîkayanê îqtîdarî ra 2022 hetê ekonomî ra do zaf xirab derbaz bibo. Koalîsyonê AKP-MHPyî sermaye keno zengîn la şarî rê çîyêk nêkeno. Şarî ra bace gêno dano sermaye. Seba ke Erdogan 'faîzê şenikî' de israr keno erjê lîra keweno war. No zî xora tesîrê her çîyî keno. Faturaya înadê Erdoganî şar dano.

Îqtîdar seba ke payan ser o vindero polîtîkayan dîyar keno. Eşkera yo ke eke ma nê îqtîdarî ra bixelisê krîzê ekonomîk û sosyalî zî do bêrê çareserkerdene. Ewro Tirkîya de têna krîzo ekonomîk çin o. Seba ke dewlete meseleya kurdan de polîtîkayanê asayîşî ana ca 4 trîlyon dolar xerc kerd. Şerî ra sebeb merdimî merdî, bîyî feqîr. Îqtîdarê AKP-MHPyî çimeyanê welatî pêşkêşê polîtîkayanê şerî keno. Coka îqtîdar seba çareserkerdişê krîzê ekonomîkî ganî meseleyan kurdan bi rayîrê haştîye çareser bikero.''

Kose da zanayene ke eke sendîka, partî, rêxistin û dezgehî pîya têbigêrê û têkoşînê xo rêxistin bikerê eşkenê heqê krîzan ra bêrê.