Tepişteyanê Zîndanê Kurkçulerî yê Adana, Zîndanê Tarsusî, Zîndanê Alanya, Zîndanê Karamanî, Zîndanê Antalya pê rayîrê telefonî keyeyanê xo reyde qisey kerd û qala binpaykerdişê heqan kerde. Tepişteyan pare kerd ke vera janê vîrusê Korona tedbîrê qîmî nêameyî girewtene.

Ebedîn Aktaşo ke Zîndanê Tarsusî de maneno îfade kerd ke vera vîrusê Korona îdareyê zîndanî tedbîr nêgirewt û gardîyanî seba hûmaritişî yenê koxuş, koxuşî dezenfekte nêbenê û maske nêdîyayî înan.

Tepişteyê Zîndanê Alanya Şahîn Yildirim û Seyît Aşkinî vat: ''Meseleya pakîye û dezenfekte esta. Ma nêeşkenê kantînî ra zî çîyêk bigêrê. Nêverdenê ma hewa zî bigêrê.''

Zîndanê Antalya ra Çetîn Sagirî zî vat: ''Maske û lapikî nêdîyenê ma. Wexto ke ma şonê revîr zî lapik û maske nêdanê ma. Doktor û gardîyanî tebîranê xo gênê. Ma seba weşîya xo qerqilîyenê.''

Mehmet Zaîr Şahîn Zîndanê Kurkçulerî de maneno. Şahînî vat: ''Ma nêeşkenê warê hemparî bixebitnê, têkilîya ma pê embazan qels bîye. Kuxuşî nênê dezenfektekerdene û maskeyî nêdîyenê ma.''

Zîndanê Karamanî ra Alî Aydinî zî vat: ''Koxuşê ma têna rayêk ame dezenfektekerdene, tedbîrêko cidî nêame girewtene.''