Kubîlay: Metodê xeyrî meşrûyî yê îqtîdaranê xeyrî meşrûyan dewre de yê

Verfekê HDPyî Gunay Kubilayî nîşan kerd ke pêlê galan ê îqtîdarî tena vera HDPyî nîyê. Îqtîdar wazeno ke muxalefetê tewr bitesîrî ra raxelesîyo û dima verê xo biaçarno yê bînan.

Verfekê HDPyî Gunay Kubîlayî operasyonê binê nezaretî girewtişî yê tewr peyênî yê ke vera HDPyî yenê kerdene ANFyî rê nirxnayî.

Kubîlayî ard vîrî ke bi taybetî zî weçînitişanê 31ê adare ra tepîya îqtîdarê AKP-MHPyî HDP verê îqtîdarê xo de sey astengo tewr pîl dî û naye ra dest bi pêla galan kerd. Kubîlayî ard ziwan ke metodê xeyrî meşrûyî yê îqtîdaranê xeyrî meşrûyan dewre de yê.

Kubîlayî dîyar kerd ke furyaya binê nezaretî girewtişî ya peyêne zî reyna yew parçeyê operasyonê vera HDPyî bî. Kubîlayî vat: “Hetê ra rejîmê kayuman, hetê bînî ra şîdet, gaz, cop, rehîn girewtişî.” Kubîlayî bale anite ser ke binê nêzaretî girewtişî dima deklaarasyonê HDPyî ra ameyî kerdene û no yew tesaduf nîyo. AKP keno ke îqtîdarê xo bi zorbazîye dewam bikero.

Kubîlayî dîyar kerd ke înan bi sebebo lazim ê polîtîkî yê vengdayîşê weçinitişê rewî yo ke deklarasyono de kerdo, rîyê îqtîdarî yo xeyrî meşrûyî musnayo komelî. Kubîlayî wina dewam kerd: “Seba ke na hişmendîya HDPyî komelî reyde organîze meba û  sîyasîbîyayîşê na hişmendîye bero asteng kerdene gal bi HDPyî kenê. Pêro nê çî nêçareyîya polîtîke ya îqtîdarî musnenê. Komel dest pê kerdo êdî rîyê rastikênî yê AKPyî vîneno.

Xeletîya tarîxîye…

Kubîlayî dîyar kerd ke hişmendîya ke dişmenîya kurdan û HDPyî sero xo dewam kena ganî hetê her kesî ra rind bêra wendene. Kubîlayî wina dewam kerd: “Merdim verî dişmenê xo yê tewr xurtî ra dest pêkeno, çunke eke ey hal bikero ê bînan hîna asan mîyan ra darneno we.

'HDP yew bîna ra îbaret nîya’

Kubîlîyaî dîyar kerd ke eke tîya de armanc kilîtkerdişê berê HDPyî yo, bi hacetanê zorî yê ke ewro fîştê xo dest eşkenê na yewe bikerê la nêeşkenê HDPyî mîyan ra wedarnê. HDP yew bîna ra nêna warye. Kubîlayî qiseykerdişê xo wina dewam kerd: “HDP yew mekan nîyo ke şima berê ey kilît bikerê. 6 mîlyon potansîyelê rayan ê HDPyî esto û tewr kêmî xîtabê 15-20 mîlyon merdiman keno. Naye ra yo ke mesela padayîşî yew mesela zaf girînge nîya.

Esas çîyo ke wazenê bikerê no nîyo, ê wazenê ke HDPyî teybetmendîyanê awanî yê ke HDPyî kenê HDP ra dûrî bifîyê û biaçarne yew qofikê vengî. No yew cadkerdişêko bîlasebeb o. Heta ewro zaf embazê ma girîyayî binê nezaretî. Nêzdîyê 5 hezarî embazê ma hepsî yê. HDP bi qaydeyan û armancanê xo rayîrê xo dewam keno û do bikero zî.”