Vervatoxê HDPyî Gunay Kubîlayî bînaya merkeze ya HDPyî de kombîyayîşêkê çapemenîye kerd.

Qiseykerdişê Kubîlayî ra beşêk wina yo:

Hesabê Cizîrî do bêro persayene

"4 serrî verê cû ewro Cizîr de binê keyeyêkî de 189 kesî ameyî vêşnayene. Nameyê Dayîka Taybete û Mehmet Tunçî do bi tornanê ma biciwîyê. Ma do hesabê nê qirkerdişî do bipersê.''

Erdlerz, Vewrês û Qeza

Wexto ke erdlerz qewimîya merdiman persa vat ke bacê erdlerzî şîyî ça. La wezîrê dewlete wazeno ke kes vengê xo mevejo. Dezgehan, partîyan, sendîkayan, komeleyan torrêka hetkarîye viraşte la wezîrî nê hetkarîyî asteng kerdî.

Derheqê vewrêsê diyînî de îdîayêke esta ke yena vatene Şêwirmenda Serekkomarî Gulşene Orhan bi notiran leşkeran şîya uca û vengî ra vewrêso dîyîn ame meydan. Bêguman na îdîa do bêra nimitene, binê ci bêra girewtene. La ganî cade tehqîqatêk bêro kerdene û eke îdîa rast a çi hewce keno bêro kerdene.

Qezayê teyara de zî ame dîyene ke bêtebdîrîya pîle û peygoşîye esta. 

Îdlîb

Îdlîb de şer her roje beno giranêr. Sûrîye kena ke erdê xo cerganê HTŞ û OSOyî ra bipawa ke Tirkîya paştî dana nê cergan. Tirkîya Îdlîb de se kena? Çi goreyê ci uca de esto?

Ganî Erdogan eşkera bikero ke çira 8 leşkerê Tirkîya Îdlîb de merdî û çira hema zî leşkerê Tirkîya uca de yê. Erdogan Sûrîye de xapîya. La eke reyna vaja 'Putînî ez xapînaya' ganî çew goş pa nêkero.

Ganî Tirkîya Sûrîye ra vejîya

Ma reyna vengdayîşê xo kenê; Ganî Tirkîya Sûrîye ra bêşert û mercan bivejîya. Verê sîyasetê demokratîkî ganî bêro akerdene. 

Koma Yorumî

Yew koma muzîkî seba vatişê deyîran grevê vêşanîye kena. Wijdanê kesêkî naye qebul nêkeno. Ma tîya ra venga îqtîdarî danê ke cade waştişê Koma Yorumî bêrê qebulkerdene û grevê vêşanîye yê înan biqedo.

Vînbîyayîşê Kurdîstanî

Dêrsim de Gulîstan Doku 34 roj ê ke vînbîyaye ya. Şirnex de Şîmonî Dîrîl û mêrdeyê ci Hurmuz Dîrîl 11ê çeleyî ra nata vînbîyaye yê. Êlih de Mehmet Balo ke şîyo zîndan ke lajê xo bivîno 24ê çeleyî ra nata vînbîyaye yo. Ma Wezîr Soylu ra persenî vanê nê merdimî ça de yê? Ganî Soylu derheqê nê serebûtan de rayaumûmîye reyde zanayîşê zelalî bido û vinbîyayeyî bêrê dîyene. 

Tepişteyê Nêweşî

Zîndanan de binpaykerdişê heqan û îşkence zêdîyenê. Her roj rojdem de tepişteyê nêweşî, qedexeyê zîndanan û îşkenceyê bi tepişteyan estê.

Vera Cîzrespor nîjadperestîye

Cîzresporî pare kerd ke ê hînî nêeşkena vera bêedaletîya Federasyonê Futbolî yê Tirkîya (TFF) û Komîteya Hakeman ê Merkezî (MHK) têkoşîn bikerê û lîgî ra xo tepîya ant. No seba futbolê Tirkîya şermêko pîl o. Dewirê AKP-MHPyî de futbol bi hacetê hêrişê îdeolojîkî yê îqtîdarî û wesayîtê hegemonya.

Remzîye Yaşar

Hemşaredara ma ya Geverî Remzîye Yaşar di her çiqas derheqê ci de bira veradayîşî amebî dayene zî reyna ameye tepiştene. Na bire mojnena ke Tirkîya de huqûq xizmetê sîyasetî kena.