Ewro dewa Amara ya qezaya Xalfetî ya Riha de serkêşîya Federasyonê Komeleyanê Paştdayîş û Huqûqî yê Keyeyanê Tepişteyan û Hukmwerdeyan ê MEDî (MED TUHAD-FED) bi wesîleya rojbîyayîşê Rayberê Şarê Kurdî Abdullah Ocalanî şayîyêka pîle do bêra kerdene.

Xeylêk şaristanan ra kurdan verê xo da Amara ke  rojbîyayîşê 73. yê Rayberê Şarê Kurdî Abdullah Ocalanî fîraz bikerê. Xeylêk noqtayan de polîs û leşkeran xîret kerd ke şarî asteng bikerê. Leşker û polîsan rayîrê Xalfetî ser de 2 bendî nayî ro û xîret kenê ke dekewtiş û vejîyayîşê qeza asteng bikerê. Kesê ke bendan ra derbaz bîyî govende girewte û sloganê 'Rojbîyayîşê to fîraz bo Serek Apo' vat.

Serê pêro rayîranê Xalfetî de zî polîsan bendî nayî ro. Kesê ke wazenê tewrê şayîyanê Amara bibê taxa Goganî de yenê yewca. Girseyî govende girewte û sloganê 'Rojbîyayîşê to fîraz bo' vat. Wina pawîyeno ke şar şayîye ra dima dest pê rayraşîyayîşê Amara bikero.

Hetê bînî ra Wekîlê HDPyî yê Riha Omer Ocalan, endamê partîye, hunermendî do hetê keyeyê Ocalanî ra bêrê pêşwazîkerdene.