Cehdkerdişê Kurdîstanî Bipawê pê eşkerayîya nuştekîye da pêhesnayene ke semedê vindarnayîşê hêrişanê kîmyewîyan ê dewleta tirke yê vera Gerîlayanê Azadîye yê Kurdîstanî do 30ê teşrîna peyêne ra heta 3ê kanûne her ca de çalakîyî bêrê kerdene û semedê tewrbîyayîşê çalakîyan veng da.

Eşkerayîye de nê ameyî parekerdene:

''Tirkîya de çirey sey emserî sûcê şerî nêameyî kerdene. Rayrapêroyîya mîyanneteweyîye  verê xo da şerê Ukrayna û hetê bînî ra Tirkîya hêrişê îşxalî yê vera Kurdîstanî de çekê kîmyewîyî zî tede xeylêk sûcê şerî kerdî. Rixmo ke îdîayê xurtî yê şuxulnayîşê çekanê kîmyewîyan est ê rayrapêroyîya mîyanneteweyîye û dezgehê sey OPCWyî yê ke berpirsîyar ê nêşî Tirkîya ser û babete ser o nêvindetî.

Tirkîya seba ke Rojawan û Başûrê Kurdîstanî de sûcanê şerî kena tim yena protestokerdene. Îdarekarê hukmatî û temsîlkarê dezgehanê mîyanneteweyîyî tim bêveng ê. Seba ke hêzê hegemonîkî yê herême û mîyanneteweyîyî Têgêrayîşê Azadîye û felsefeya Rayberê Şarê Kurdî Abdullah Ocalanî semedê îqtîdarê xo sey tehluke vînenî, vera nê hêrişan bêveng ê. La ma sûcanê şima vînenî û ma do bêveng nêmanenê.

30ê teşrîna peyêne roja yadkerdişê pêro qurbananê şerê kîmyewîyî ya Neteweyanê Yewbîyayeyan a. Ma veng danê ke wa na roje ra heta 3ê kanûne her cayê dinya de çalakîyê paştîdayîşî bêrê kerdene. Çalakîyê sey tîyatroyê kuçeyî, çalakîyanê stadyumî, parkerdişê vîdeoyan û çalakîyî cîya cîyayî eşkenê bêrê kerdene.

Ma sûcanê şima vînenê. Hukmatî semedê menfeatê xo heqanê merdiman û pêkerdişê ke kerdî binpay kenê. Ganî ma pê çalakîyan bêvengîya hemkarîya sûcî bixeripnê. Ma do pê yewîye û paştdayîşê şaran cewabê hemkarîya sûcî yê hukmatan bidê.''