Serekê Rûmetî yê HDPyî Ertugrul Kurkçuyî Vengdayîşê ‘Haştîye û Komelê Demokratîkî’ yê Rayber Apoyî ANFyî rê ercna.

Kurkçuyî ard ziwan ke têgêrayîşê PKKyî tarîx de reya verêne seba çekverdayîşî û qedînayîşê têkoşînê çekdarî amadekarîye keno û vat: ‘’Bi pêşnîyazê Ocalanî PKKyî soz da ke bê şert û mercî şerê çekdarî biqedîno û rêxistinîya xo ya 40 serrî vila bikero. Na bire birêka krîtîk a û dîyarker a. Na bire seba qedînayîşê estbîyayîşê PKKyî her hetî ra gamêka zaf dîyarker a. No proses seba çareserîya meseleya kurdan firsendêko pîl o.’’

Kurkçuyî îfade kerd ke seba ke proses bi hawayêkê pozîtîfî bêro îdarekerdene ganî Rayber Apo bieşko bi azadî têbigêro. Kurkçuyî vat: ‘’Abdullah Ocalanî mesuldarîya prosesî girewta xo milî. Seba ke proses bi hawayêkê pozîtîfî îdare bibo ganî îmkanî bêrê dayene Ocalanî. Mîyanê şertanê tecrîdî de birêz Ocalan do nêeşko prosesî îdare bikero. Proseso ke bi vengdayîşê Rayber Apoyî dest pêkerdo seba ke bi hawayêkê pozîtîfî aver şoro zemînêko huqûqî û warê karî ganî bêro amadekerdene.

Kesê ke netîceya operasyonanê serê PKKyî de tepişîyayê û muhakeme benê ganî dewayê vera nînan bêrê betalkerdene. Eke werte de ‘rêxistinêke’ çin biba sûcdarîya ‘endamîya rêxistine’ zî ganî çin biba.’’ 

Kurkçuyî da zanayene ke êyê ke nê prosesî bi temamî îdare kenê Qesre ra yê û vat: ‘’Yanî Erdogan o. Erkê Bahçelîyî nîyo ke bire bido. Erko ke ferman bido dozgeran, walîyan yan zî Wezîrîya Edaletî Erdogan o. La ma hema nêdî ke Erdoganî babete ser o îrade mojnayo.’’