Komeleya Cigêrayîşanê Kurdan her serre bi hezaran wendekeran rê perwerde dano. Komele de kurdê kirdkî û kurmanckî dîyenê. Kursê emserînî rîyê vîrusê Korona ra do ZOOMî ser o bi online 24ê teşrîna verêne de do dest pêbikerê. 

Komele de kursê kirdkî roja pancşeme û îneyî de mabênê saetanê 18:00 û 20:00 de bêrê dayene. Kursê kurmanckî zî her roje mabênê saetanê 20:00 û 22:00 de do bêrê dayene. 

 Hemsereka Komeleya Cigêrayîşan Lemane Elmas da zanayene ke 600 kesan muracatê kursan kerd û seba kursan eleqeyê şarî tim zêdîyeno. 

Lemane Elmas vat: '' Ma kotaya kursanê xo zêdînaye. Vera kurdan û kurdkî polîtîkayê asîmîlasyon û îmha dewam kenê. Hema destûr nêno dayene ke kurdî bi ziwanê xo tîyatro bikerê. Ê wazenê bi nê qedexe û kerdişan ziwan û kulturê ma çin bikerê. Ganî ma vera naye bêveng nêmanê. Ganî kurdkî hînî bibo rojdemê kurdan. Mîsal ma keyeyê xo de domananê xo de ganî kurdkî qisey bikerê. Eke ma wayîrê ziwan û kulturê xo vejîyê eşkenê verê asîmîlasyonî bigêrê.''