Komeleya Huqûqnasan a Semedê Demokrasîyî ya Ewropa (European Assocation of Lawyers For Democracy & World Human Rights (ELDH), Avûkatî Semedê Avûkatan (Lawyers For Lawyers) û AEDyî vizêr semedê Îmraliyî muracatê Komîteya Vergirewtişê Îşkenceyî yê Ewropa (CPT) kerd. Nê rêxitinanê huqûqî ra Lawyers For Lawyersî derheqê babete eşkerayîya nuştekîye nuşte û nê pare kerdî:

''Avûkatê Buroyê Huqûqî yê Asrinî 27ê temmuza 2011î ra nata nêeşkena muwekîlê xo Abdullah Ocalanî zîyaret bikero. Reyna Omer Hayrî Konar, Hamîlî Yildirim û Veysî Aktaş ê ke 2015î ra nata Îmrali de yê ê zî nêeşeknê avûkatanê xo bivînê. Hetê bînî ra rayîrê resnayîşî yê bînî zî ameyî tengkerdene.  Heqê telefonî yo peyêno ke dîya Abdullah Ocalanî 25ê adara 2021î de ame kerdene û no zî hetê îdarekaranê zîndanî ra ame birnayene. Avukatî 2016î ra nata nêeşkenê biresê dosyayanê dewa zî. Mehkemeya Heqanê Merdiman a Ewropa qerar da ke Ocalan edîl nêameyo muhakemekerdene û ganî dewa newe ra bêro kerdene.''

Eşkerayîye de ame vîr vîstene ke  5ê nîsana 2022î de Lawyers For Lawyers zî tede xeylêk rêxitinanê avûkatan muracatê CPTyî kerd û ame vatene ke heqê avûkatanê Buroyê Huqûqî yê Asrinî û muwekîlanê înan yenê binpaykerdene. Eşkerayîye de veng dîya Tirkîya û waştişî ameyî rêzkerdene: ''Ganî cade avûkatê Buroyê Huqûqî yê Asrinî  muwekîlanê xo yê ke Îmrali de yê reyde pêvînayîş bikerê. Ganî zextê vera avûkatan cade bêrê qedînayene, înan rê mudaxale nêro kerdene. Wa avûkatî goreyê qanûnî bieşkê biresê dosya û belgeyan. Wa Tirkîya goreyê pêkewtişanê mîyanneteweyî têbigêro.''