Serkêşîya KCD, TJA, DBP û HDPyî de semedê pawitişê xoza ver bi Koyê Cûdîyî rayşîyayîşêk ame kerdene.

Bajaranê cîya cîyayan ê Kurdîstanî ra şarî verê xo da Şirnexî. Reyna metropolanê Tirkîya ra zî xeylêk kesî kewtê rayîrê Cûdîyî. Hemserekê KCDyî Berdan Ozturk û Hemserekê DBPyî Salîha Aydenîz û Keskîn Bayindir û temsîlkarê rêxistinanê komelê sîvîlî zî tede bi seyan kesan Êlih de ameyî têhet. Dekewtişê bajarî de qolê Serhatî zî ame û şarî verê xo da qezaya Hezexî yê Şirnexî.

Riha, Dîlok, Adana, Mersin û Mardîn ra zî Vervatoxa HDPyî Ebru Gunay zî tede xeylêk kesî Nisêbîn de ameyî têhet. Hewtî ra heta hewtayî şar ver bi Cizîre kewt rayîr û resa qolê bînî. Şar tîya ra ravêrt warê Milga Şantîye. Leşkeranê tirkan bi awa tazîkin û bombayanê gazî hêrişê şarî kerd la şar peyser anêgêra.