Artêşa tirke ya ke dewê Geverî dayî bombayan ver cinî, qic û extîyarî zî tede tewr tay 20 dewijî pê îşkenceyî berdî waranê hêrişî. Dewijan ra 13 kesî ameyî destbendkerdene û ê bînan ra xebere nîna girewtene.
Herêma Astenga Reşe ya ke dormeyê dewanê Şîşemzîn, Xurekana, Seyîda û Xurekana Temoyî yê qezaya Geverê Colemêrgî de ya hêrişê leşkerî dewam kenê. Herêma ke tede pêkewtişê giranî qewimîyene rê vizêr 3 ambulansî ameyî sewqkerdene.
Leşkeranê tirkanê ke pê wesayîtanê zirxinan eşt dewan ser qicê 11 serre zî tede xeylêk kesan rê îşkence kerd. Leşkeran dima ra qicî eştê verê berê înan û înan rê heqeret kerd. Leşkeran qicêko 8 serre û cinîyê estîyarî zî tede tewr tay 20 kesî destbend kerdî û pê zorî berdê waranê hêrişî. Goreyê zanayîşanê ke dewijan ra ameyî girwetene dewijê ke ameyî berdene waranê hêrişî dest nîya telefonanê înan ser. Şiwanê dewa Şîşemzînî zî ameyî destbendkerdene û tehdîtkerdene.
13 kesê ke ameyî berdene warê hêrişî û dima ra ameyî destbendkerdene nameyê înan wina yê: Zozane Turgut (45), Nevine Turgut (8), Rahmi Turgut, Rojhat Turgut, Deniz Turgut, Necmettin Turgut, Nedim Turgut, İzzettin Turgut, Behçet Engudar, Frat Engudar, Demhat Engudar, Birhat Engudar û Ozgur Engudar.”
Zozane Turgut û Nevine Turgup pîya di cînayan ê bînanê ke nameyê înan nêame zanayene serbest ameyî veradayene. Derheqê kesanê bînan de zanayîş nêame girewtene ke sera ameyî berdene. Dewijê Şîşemzînî ya ke dekewtiş û vejîyayîşê ci qedexeyê û binê ablûqaya polîsan de ya, semedê merdimanê xo qesawet kenê. Dewijanê semedê hîsgêrîye veng da rayapêroyîye.
Seba ke şiwanî ameyî destbendkerdene peso ke bêwayîr mend ra zafê ci vînî bi.
Hetê bînî ra avûkatê OHDyî ke semedê dewijan şîyî Fermandarîya Leşkeran a Geverî, tîya raştê hêrişî ameyî. Hemserekê OHDyî yê Şûbeyê Colemêrgî Gunaye Karataş û Firat Îke hetê leşkeran ra ameyî derbkerdene û erdî ra ameyî kaşkerdene. Avûkate Karataşa ke semedê raporî şîye nêweşxane ard ziwan ke ê bi talîmatê Fermandarê Leşkeran ê Qeza Bayram Konakî ameyî derbkerdene.
