Sendîkawane Leyla Dogana ke 26ê teşrîna peyêne de amebî destbendkerdene nezaret de tepişîyena. Leyla beno ke krîzê epîlepsî biba. Hemsereka SESî ya Bakirkoyî Nezahate Altinsoy Ozen derheqê babete de ajansê ma rê qisey kerd.

Nezahate vist vîrî ke Leyla Dogan reyde endamê sendîkaya înan Enîs Boran û Erdal Guzel zî ameyê destbendkerdene. Nezahate vat: ''Rewşa weşîya Leyla giran a. Leyla verê cû zî nêweş bibî. A nêeşkena rayîr a şorê û hendê qisey bikera. Beno ke a nişka ra krîzê epîlepsî biba. Ma nêzanenê ke çira çar rojan ra nata a nezaret de tepişîyena. Na rewşe aye rê îşkence ya.''

Nezahate îfade kerd ke îqtîdar keno ke bi nê operasyonan çimê şarî bitersno û vat: ''Îqtîdarî bi tayberî 15ê Temmuze ra pey bi KHK û qanûnan hêrişê sendîkayan kerd. Nê tepiştiş û destbendkerdişî seba çimtersnayîşî yê. La ma do sereyê xo nêarê war. Ganî embaza ma Leyla û embazê bînî vera bidîyê. Leyla bi sereyê xo nêeşkena îhtîyacanê xo peyda bikera. Nê tedayî do bi KESK û SESî nêeşkê. Ma do ala xo nêarê war.''