Ann Lînde cewab da mektuba  “Koma Paştgîrîya Kurdan” a ke parlementeranê 8 partîyan ra yena pê û aye ra waşt ke vera îşxalê Tirkîya helwestêk nîşan bida. Lînda parlementeran rê seba hesasîyetê înan sipas kerd.

Lînde ard ziwan ke a zî wayîrê eynî qisawetan a û vera Vakur û Rojhelatê Sûrîye îşxalê Tirkîya beno sebebê nê qisawetan û vat: “Çend hefteyanê peyênan de mi herême de îşxalê Tirkîya û kurdan û kêmneteweyan rê zulmkerdişê Tirkîya şermezar kerd.” 

Lînde nîşan kerd ke îşxalkerî vera peymananê mîyanneteweyîyan a, do herême hîna zaf nearam bika û eşkena herême de biba sebebê problemanê merdîmîyanê pîlan.

Lînde ard vîrî ke çekan bi Tirkîya rotiş dayo vindarnayene û seba ke welatê bînî yê Ewrupa zî eynî çî bikerê babete fîşta rojeva Yewîya Ewrupa. Lînde nîşan kerd ke a do babete teqîb bikera û reyna rewşa Rojawanî nêzdî ra teqîb bikera. 

Tirkîya ke seba îşxalê Rojawanî dest pê galanê xo kerd dima Swêdî de 17 parlementeranê “Koma Paştgîrîya Kurdan” mektubêke Neteweyanê Yewbîyayeyan, Yewîya Ewrupa û Wezîra Karanê Teberî ya Swêdî Ann Lînde rê erşawitbî û înan ra waştîbî ke vera îşxalanê Tirkîya tedbîran bigîrê.