Herêma Tottehnamî ya paytextê Îngîlîstanî London de ciwano bi nameyê Alî Baygoren (17) gama ke keyeyê xo ra vejîyayêne ame kardkerdene û dinyaya xo bedilnaye.

Goreyê zanayîşê ke keyeyê ci dayî di kesî bi şikdarîya mergê Alî Baygorenî hetê polîsan ra ameyî destbendkerdene.

Demê peyênî de herêma vakurê Londonî ke tede zaf macîrê kurd û tirkî est ê de hetê çeteyan ra xeylêk cînayetî ameyî kerdene. Badê şehadetê Alî Baygorenî şar wirişt payan ser.

Îdareker û endamê Federasyonê Elewîyan ê Brîtanya, Xemxane, Meclîsê Şarî yê Kurdan, Gîk-Der û komeleyanê herêmîyan zî tede bi seyan kesî ameyî têhet, verî eşkerayîye daye û dima ra ver bi Qereqolê  Tottehnamî kewtî rayîr. Verê qereqolî de bi nameyê şarî Vervatoxê Gîk-Derî Îbrahîm Avcilî qisey kerd.

Avcilî bale ante hêrişê çeteyan ê warê macîran ser û ard ziwan ke polîsê îngîlîzî vera înan xebatêka zixm nêkeno. Avcilî vat: ''Ma zaf rey polîsan rê qesawetê xo vatî la polîsan çirey goş pa nêkuwa. Coka dewleta ke tedbîrî nêgirewtî, kiştoxê Alîyî ya. Qicê ma yê ke eleqeya înan bi çeteyan çîn a, benê qurbanê çeteyan. Wextê ci yo ke ma vera nê çeteyan wirzê payan ser. Eke polîs tedbîran nêgeno, mecbur ganî ma tedbîran bîgêrê, xo bipawê. Ma do vera çeteyan xoverdayîşêk bidê destpêkerdene. Wa her kes tewrê aktîvîte û çalakîyanê ma bibo.''