Vakurê Londonî de 18ê hezîrane de ciwano kurd Alî Baygoren (17) amebi kiştene. Domanêko 15 serre sey kiştoxê Alîyî tepişîya la komelî vera ney nêrazîbîyayîşê xo mojna û vat ke mesuldarê esasî dewlete û polîs ê.

Meclîsê Şarê Kurdî, Day-Mer, Gîk-Der, rêxistinê elewîyan, komeleyê herêmîyî zî tede, Yewîya Hêzî ya Demokratîke bi şîarê 'Çetebîyayîşî rê ney' veng da û vengayîşê înan ser o bi hezaran kesî verê Stadyumê Tottenhamî de ameyî pêser.

Girseyî vera sloganê 'Kiştoxe dewlete, kiştox polîsî', 'vera çeteyan mil bi mil', 'Bêveng nêbe, dore do bêra to' vatî. Babîyê Alîyî Îbrahîm Baygoren verê koretejî de şi. Çalakîye de vera polîsan û hukmatî nêrazîbîyayîş ame mojnayene. Girseyî dima herêma Angel Cornerî de çalakîya roniştişî kerde.

Tîya de qiseykerdişî ameyî kerdene û ame vatene ke çimeyê esasî yê peygoşîye û çaresernêkerdişê çeteyan dewlete, hukmat û polîs ê.

Qiseykerdişan ra dima rêxistinanê komelê sivîlî selahîyetdaranê polîsan de pêvînayîşî kerdî û wextê qiseykerdişî de girseyî dormeyê qereqolî de çalakîya şermezarkerdişî rê dewam kerd.