Namzeda Şaredarîya Rezanî ya DEM Partî Leyla Ayaz qezaya Licê ya Amedî de dadîya xo ra bîya. Aye heta nika hemserekîya MEBYA-DERî ya Amedî kerde, mîyanê TJA û DBPyî de erkî kerdî. Leyla ANFyî rê qisey kerd.

Leyla îfade kerd ke a tradîsyonê têgêrayîşê cinîyan ê kurdan teqîb kena û seba ke hêz bida têkoşînê cinîyan bîya namzede. 

Leyla bale ante ser ke Kurdîstan de polîtîkayê şerê taybetî bi destê qeyûman hîna zaf ameyê vilakerdene û vat: ''Tewr zaf Amed binê tesîrê şerê taybetî de yo. Şaristan de cinî û ciwanan rê fuhuş, madeyanê tîryakî, qirkerdiş, vêşanîye û bêkarîye yenê ferzkerdene. Sey DEM Partî ma vera nê kerdişan têkoşînêkê xurtî kenê. Eke ma ser bikewê ma do şaredarîya Rezanî bikerê şaredarîya cinîyan. ke dizî, talan û werankerdişî ra ber qeyûman çîyêk nêkerdo. Ma do pêro texrîbatanê bi temamî wedarnê. Ma do erjanê şarî apey bigêrê. Xora no proses do emrderg bibo la ma qerardar ê ke şaredarîye bikerê ekolojîk, demokratîk û azadîgîra cinîyan.''

Leyla ard ziwan ke ê do seba cinîyan keyeyanê bextwaştişî merkezan abikerê û vat: ''Heyf ke Rezan de şîdetê vera cinîyan zaf zêdîyayo. Vera ney ma do têkoşîn bikerê û warê huqûq û psîkolojî de destek bidê cinîyan ê mexdûran. Ma do seba cinîyan keyeyanê bextwaştişî abikerê û vera ferasetê serdestîya camêrdan perwerdeyan bidê. Ma do pîya ser bikewê û şaredarîye pîya îdare bikerê.''