Hemserekê Konfederasyonê Sendîkayanê Kedkaranê Umûmîye (KESK) Mehmet Bozgeyîkî derheqê budçeya 2022î û tezkereyê şerî de ANFyî rê qisey kerd. 

Bozgeyîkî bale ante ser ke şar nêeşkeno tewrê prosesê amadekarîya budçe bibo û bi sîstemê hukmatê serekkomarîye amadekarîya budçe destê Meclîsî ra zî şîye. Bozgeyîkî vist vîrî ke budçe semedê şarî nê semedê sermayedaran û terefgîranê îqtîdarî yena amadekerdene.

Bozgeyîkî ard ziwan ke Tirkîya mîyan krîzêkê pîlî de ya, xizanîye û bêkarîye vera zêdîyena. Bozgeyîkî vat: ''Meaşo asgarî 2 hezar û 850 TL yo la sînorê vêşanîye 3 hezar û 50 TL yo. Ganî budçe mîyanê pêro beşanê komelî de bêra parekerdene. Eke tercîh kede bibo krîz werte ra wedarîyeno.''

Bozgeyîkî eşkera kerd ke îqtîdar semedo ke emrê xo derg bikero polîtîkayanê neteweperestan û şerî geş keno û vat: ''Newekerdişê tezkereyê Sûrîye û Iraqî prosesêko xeylêk tehlukeyîn o. şer yeno manaya xizanîyêka pîle, bêkarîye û şuxilîyayîşê çimeyan. Sey KESKî ma terefgîrê haştîye yê. Ma venga partîyanê muxalefetî danê ke Meclîs de wurzê payan ser û  tezkereyî rê vajê nê.''