Mehkemeya Qanûnê Bingeyî (AYM) blokajê hetkarîya xezîna ya HDPyî wedarit.  Endamêkê/a AYMyî îfşa kerd ke bira wedaritişî blokajî ra dima Erdoganî telefonê endamanê AYMyî kerdo. Komîsyonê Heqanê Merdiman û Huqûqî yê HDPyî ra Avûkat Serhat Erenî no serebût seba ANFyî şirove kerd.

Erenî îfade kerd ke înan destpêkî ra nata vatêne ke dewaya qefilnayîşê HDPyî polîtîk a û vat: ''Ma tim vatbi ke na dewa teda û waştişê îqtîdarê AKP-MHPyî ser o  ameya akerdene. Na dewa 2015 de bi operasyonanê tepiştişî dîyabî destpêkerdene. Blokajê vera hetkarîya xezîna ya partîya ma cara birêka bêhuqûqîye bi. Hema ke dewaya qefilnayîşî nêqedîyabî na bire dîyaye. Coka bira blokajî meşrû nêbîye.''

Erenî ard ziwan ke îtîrazê înan ser o Mehkemeya Qanûnê Bingeyî bira blokajî wedarita û vat: ''Erdoganî seba ke hesabê wedaritişê blokajî biperso telefonê endamanê AYMyî kerdo. No zî eşkera keno ke dewaya qefilnayîşî waştişê îqtîdarî ser o ameya akerdene. Erdogan bi rehetî eşkeno endamanê mehkemeyan rê hesab biperso. No zî mojneno ke dezgehê muhakemekerdişî binê destê îqtîdarî de yo. Naye ra ma nêeşkenê vajê ke dewaya vera partîya ma do senî netîce bida. Yanî bira wedaritişê blokajî derheqê netîceya dewa de yew sînyal nêdana.''