Serkêşîya Platformê Cinîyan ê Dicle û Torra Têkoşînê Vera Şîdetî yê Amedî de bi wesîleya 27ê Teşrîna Peyêne Roja Têkoşînê Vera Şîdetê Serê Cinîyan bi hezaran cinîyî  Meydanê Şêx Sêîdî de ameyî têhet. Hemşaredara Pêroyî ya DBPyî Çigdeme Kiliçgun Uçar, sîyasetmedarê kurdî Gultane Kişanak û Ayla Akat Ata, wekîlî û hemşaredarî zî tede bi hezaran cinîyî tewrê tewrê çalakîye bîyî.

Rixmê ablûqaya polîsan cinîyan bi slogananê “Jin jiyan azadî”  û “Bijî berxwedana jinan” û tîlîlîyan test pê rayraşîyayîşî kerd.

Bi sernameyê  ''Semedê azadîya cinîyan û haştîya komelkî: Jin, Jiyan Azad'' eşkerayîye ameye dayene. Cinîyan vat: ''Ma vera sîstemê camêrdan ke tim estbîyayîşê ma hedef geno, tîya ameyî têhet. Ma tîya ra reyna soz danê ke ma do bi Jin,Jiyan Azadî têkoşînê xo bi hewayêkê qerardarî bidomnê. Vera heme rejîmanê kanperestan têkoşînê cinîyan dewam keno. Vengê Jina Jiyan Azadî rixmê heme qedexeyan yew fekî ra reseno azmînî. Ma do sey têgêrayîşê cinîyan ê kurdan vera zîhnîyetê qirkerî tim têkoşîn bikerê. Şîdetê dewlete bi qeyûman dewam keno. Bi qedexeyê Jin, Jiyan Azadî wazenê veng, têkoşîn o xoverdayîşê cinîyan bifatisnê. Jin, Jiyan Azadî sembolê têkoşînê Têgêrayîşê Cinîyan ê Kurdan o ke heme dinya de bîya hêvîya cinîyan.''

Dima ra Serekwekîla Koma DEM Partî Gulistane Kiliç Koçyigit, bi nameyê TJA Gultane Kişanak û Hemsereka Pêroyî ya DBPyî Çîgdeme Kiliçgun Uçar zî derheqê hêrişê vera cinîyan û têkoşînê cinîyan de qisey kerd. Çalakîye bi slogananê “Jin jiyan azadî” qedîyaye.

Reyna bajaranê bînan ê Kurdîstanî û Tirkîya de bi wesîleya roja vera şîdetê serê cinîyan cinîyî vejîyayî waran vera qirkerdiş, şîdet û zextanê serê cinîyan nêrazîbîyayîş mojna.